Ինչ է վարդագույն որքինը և որոնք են դրա առաջացման պատճառներն ու ախտանշանները

20:21 • 08.02.19

Վարդագույն որքինը (розовый лишай) ամենատարածված մաշկային հիվանդություններից մեկն է, որը բնորոշվում է մարմնին, պարանոցին ու վերջույթներին ի հայտ եկած վարդագույն, թեփոտված բծերով:

Առավել հաճախ այս հիվանդությունն ի հայտ է գալիս աշնանն ու ձմռանը և կարող է պայմանավորված լինել ինչպես վարակիչ հիվանդություններով, այնպես էլ գերսառեցմամբ: Որպես կանոն այն որևէ բուժում չի ենթադրում և որոշ ժամանակ անց անցնում է առանց բժշկական միջամտության, սակայն լինում են նաև դեպքեր, երբ անհրաժեշտ է լինում դիմել մասնագետին:

Սովորաբար այս հիվանդությունը հանդիպում է միջին տարիքի կանանց մոտ, իսկ շատ ավելի հազվադեպ՝ երեխաների ու ծերերի:

Հիվանդության ընթացքն ու ախտանշանները

Վարդագույն որքինի դեպքում առաջին հերթին ի հայտ է գալիս առաջնային վահանիկը, որը մյուսներից շատ ավելի մեծ է լինում (2-6 սմ) և առավել հաճախ առաջանում է անրակների կամ թիակների հատվածում: 7-10 օր անց ի հայտ են գալիս բազմաթիվ բծեր կամ բշտիկներ, որոնց չափերը չեն գերազանցում 1-2 սմ-ը: Այդ բծերը սովորաբար լինում են բաց վարդագույն կամ դարչնագույն և պատված են լինում թեփով:

Այս հիվանդության դեպքում ցանը սովորաբար ի հայտ է գալիս ցայլքի հատվածում, ազդրերի ներքին հատվածում և ծալքերի հատվածում:Մեծահասակների մոտ հիվանդությունը սովորաբար չի ախտահարում դեմքի, դաստակների ու ոտնաթաթերի մաշկը, լորձաթաղանթներն ու գլխամաշկը:

Վարդագույն որքինը դրսևորվում է շատ թույլ քորով, կամ առհասարակ չի ունենում նման ախտանշան, ուստի սաստիկ քորի առկայությունը կարող է խոսել մեկ այլ խնդրի մասին:

Այս հիվանդությունը շատ լուրջ վտանգ չի ներկայացնում օրգանիզմի համար, սակայն հարկ է հիշել, որ տիպիկ ախտանշաններից բացի այն կարող է ունենալ նաև ատիպիկ ախտանշաններ, որոնք բնորոշ են վարդագույն որքինի տարբեր ենթատեսակներին: Սա է պատճառը, որ այն այնուամենայնիվ չի կարելի անտեսել:

Նյութի աղբյուրը՝ healthinfo.ua