6 ախտանշան, որոնք կարող են պայմանավորված լինել վահանաձև գեղձի խնդիրներով

20:14 • 12.02.19

Վահանաձև գեղձը մարդու ամենակարևոր օրգաններից մեկն է, որի հետ կապված ցանկացած խնդիր անդրադառնում է ամբողջ օրգանիզմի վրա: Նման տհաճ հետևանքներից խուսափելու համար հարկավոր է ժամանակին քայլեր ձեռնարկել, ուստի ձեզ ենք ներկայացնում վահանագեղձի ֆունկցիայի խանգարման մասին վկայող 6 ախտանշան, որոնց դեպքում հարկավոր է խորհրդակցել ներզատաբանի հետ:

1. Քաշի ավելացում

Եթե քաշն ավելանում է անգամ առողջ սննդակարգի և ֆիզիկական ակտիվության դեպքում, ապա խնդիրը կարող է պայմանավորված լինել գեղձի ոչ բավարար ակտիվությամբ՝ հիպոթիրեոզով: Բանն այն է, որ հենց այս օրգանի հորմոններ են կարգավորում նյութափոխանակության արագությունը, ուստի հիպոթիրեոզից տառապող մարդկանց նյութափոխանակությունն ավելի դանդաղ է տեղի ունենում, ինչի պատճառով էլ քաշն ավելանում է:

2. Ուժերի պակաս

Եթե մշտական հոգնածությունն ուղեկցվում է այս ցանկում ներկայացված այլ ախտանշաններով, ապա խոսքը հիպոթիրեոզի մասին է, քանի որ այս խնդրի դեպքում սա շատ տարածված ախտանշան է: Այնուամենայնիվ հոգնածությունը կարող է պայմանավորված լինել նաև այլ խնդիրներով, ուստի հարկավոր է շատ ուշադիր լինել:

3. Դող

Մշտապես սառը վերջույթներն ու դողը նույնպես կարող են պայմանավորված լինել վահանագեղձի խնդիրներով: Այս գեղձի հորմոններն ազդում են նաև արյունատար անոթների լայնացման մակարդակի վրա, և հենց այս ցուցանիշն է որոշում՝ կմրսի մարդը, թե ոչ:

4. Մազերի բարակում

Բարակ, չոր ու անկենդան վարսերը, ինչպես նաև չոր ու թեփոտվող մաշկը վկայում են վահանաձև գեղձի աշխատանքի խանգարման մասին, քանի որ այս գեղձի հորմոնները շատ կարևոր են մաշկի ու մազերի համար: Սա է պատճառը, որ վահանագեղձի աուտոիմունային խանգարումները հաճախ ուղեկցվում են օջախային ալոպեցիայով:

5. Տրամադրության անկում

Հիպոթիրեոզի դեպքում հաճախ է նկատվում տրամադրության մշտական անբացատրելի անկում: Այս դեպքում կարող է ամեն ինչ լավ լինել, սակայն հիվանդը կշարունակի տխրել, անհանգստանալ ու նյարդայնանալ:

6. Փորկապություն

Քրոնիկ փորկապությունը նույնպես հաճախ կապված են լինում վահանաձև գեղձի խանգարումների հետ: Եթե աղիները դատարկվում են շաբաթական առավելագույնը երեք անգամ, դեֆեկացիայի ակտն ուղեկցվում է ցավով և առկա են մշտական տհաճ զգացողություններ, ապա հարկավոր է դիմել մասնագետին:

Նյութի աղբյուրը՝ medikforum.ru