Որ գործոններն են նպաստում մինչև 50 տարեկան կանանց մոտ սրտանոթային հիվանդությունների զարգացմանը

22:09 • 15.02.19

Որպես կանոն կանանց մոտ սրտանոթային համակարգի հիվանդությունների առաջացման հավանականությունը բարձրացնող հիմնական գործոնն է համարվում տարիքը, քանի որ այս հիվանդություններն առավել հաճախ հանդիպում են 55 տարեկանից բարձր կանանց մոտ, սակայն վերջին շրջանում այս հիվանդությունները զգալիորեն «երիտասարդացել են»:

Canadian Medical Association Journal պարբերականը հրապարակել է գիտնականների կարծիքն այն մասին, որ այս հիվանդությունները կարող են հանդիպել նաև երիտասարդ կանանց մոտ, իսկ դրա համար կան նպաստող մի շարք գործոններ:

«Սրտամկանի հետ կապված խնդիրների հետևանքով մահացության մակարդակը 50 տարեկանից ցածր կանանց շրջանում բավական բարձր է և չի նվազում», - հայտարարել են կանադացի գիտնականները՝ ընդգծելով, որ կան մի շարք տարածված գործոններ, որոնք նպաստում են նման դինամիկայի պահպանմանը:

Մասնագետների խոսքով՝ երիտասարդ ու միջին տարիքի կանանց մոտ սրտանոթային հիվանդությունների առաջացմանը նպաստող տարածված գործոնների շարքին են դասվում.

· շաքարային դիաբետի կամ մետաբոլիկ համախտանիշի առկայությունը,

· ծխախոտի չարաշահումը,

· ձվարանների դիսֆունկցիան և վաղաժամ դաշտանադադարը, որը կարող է պայմանավորված լինել վիրահատական կամ դեղորայքային միջամտությամբ,

· բարդություններով ուղեկցվող հղիությունը (հեստացիոն հիպերտենզիա և պրեէկլամպսիա),

· անպտղությունը (այս գործոնը դեռ կասկածելի է, քանի որ հարկավոր են հավելյալ ուսումնասիրություններ անպտղության ու սրտի հիվանդությունների կապն ապացուցելու համար):

Գիտնականներն ընդգծում են, որ 50 տարեկանից ցածր կանայք, որոնք բախվել են նշված խնդիրներին, պետք է շատ ավելի ուշադիր լինել իրենց առողջության նկատմամբ և պարբերաբար հավելյալ բուժզննում անցնեն սրտաբանի մոտ:

«Սրտի հիվանդությունների առաջացման հավանականությունը հաշվի առնելիս բժիշկները հաճախ ուշադրություն են դարձնում հիվանդի տարիքին ու այլ ավանդական ցուցանիշներին և կարող են հաշվի չառնել նման հիվանդություններին ոչ բնորոշ գործոնները», - նախազգուշացնում են մասնագետները: