Ախտանշաններ, որոնք հուշում են, որ հասարակ խալը կարող է դառնալ մաշկի քաղցկեղի պատճառ

12:08 • 20.02.19

Քաղցկեղի ամենավտանգավոր ու մահաբեր տեսակներից մեկը մելանոման է, որը մաշկի քաղցկեղի ենթատեսակ է: Այն, որ այս հիվանդությունը հաճախ սկսում է զարգանալ հասարակ խալում ընթացող որոշ գործընթացներից, քչերին է հայտնի և հենց սա է պատճառը, որ ինչի խալերի հետ տեղի ունեցող փոփոխությունները նկատելու դեպքում մարդիկ ոչ միշտ են ուշադրություն դարձնում դրանց:

Բժշկական գիտությունների դոկտոր Նիկոլայ Պոտեկաևը ներկայացրել է այն հիմնական ախտանշանները, որոնք կօգնեն հասկանալ, թե որ դեպքում է խալը համարվում չարորակացող և երբ է հարկավոր անհապաղ բուժզննում անցնել:

Մասնագետի խոսքով՝ վտանգավոր խալի մասին վկայող ամենաակնհայտ ախտանշանները հինգն են: Դրանք են.

· խալի շուրջ օղակաձև բորբոքումների ի հայտ գալը,

· խալի չափերի մեծացումը,

· խալի գույն փոփոխությունը, մգվածությունը կամ մուգ բծերի ի հայտ գալը,

· քորը, ցավը, ծակծկոցը և առհասարակ խալի հատվածում ցանկացած տհաճ զգացողության առկայությունը (մասնագետը հիշեցնում է, որ առողջ խալը «համր» խալն է),

· խալի վրա նախկինում աճող մազերի թափվելը:

Խոսելով չարորակ խալերի ախտանշանների մասին՝ փորձագետն ընդգծել է, որ առանձնահատուկ ուշադրություն է հարկավոր դարձնել նաև խալի եզրերին և դրա ընդհանուր վիճակին: Եթե խալի եզրերն անհարթ են, իսկ մակերևույթն արյունահոսում է, ապա հարկավոր շտապ բուժզննում անցնել:

Մաշկի քաղցկեղի այս տեսակը բավական տարածված է և մահաբեր, ինչը պայմանավորված է արևի ազդեցությամբ, քանի որ մելանոմայի զարգացման հավանականությունը բարձրացնող հիմնական գործոններից մեկն արևային այրվածքներն են:

Մասնագետների խոսքով՝ այս հիվանդության բարեհաջող բուժման համար այն հարկավոր է հայտնաբերել դեռ մինչ մետաստազների տարածումը, սակայն խնդիրն այն է, որ մելանոման տարբերվում է իր արագ զարգացմամբ ու ագրեսիվությամբ: Սա է պատճառը, որ հիվանդության ախտանշաններն իմանալը կենսական նշանակություն ունի յուրաքանչյուրի համար:

Նյութի աղբյուրը՝ medikforum.ru