Բնական միջոցներ ստամոքսի այրոցից ազատվելու համար

17:01 • 06.03.19

Ստամոքսի այրոցը (այրոցք) բավական տհաճ ու տարածված ախտանշան է, որն առաջանում է կերակրափող դուրս նետված աղաթթվի հետևանքով: Սովորաբար կոկորդի և կրծքավանդակի հատվածում այրոցի զգացումն առաջանում է սխալ սնվելու, ալկոհոլի ու ծխախոտի չարաշահման կամ ձիգ կապված գոտու պատճառով: Բացի այդ, շատ հաճախ այս խնդիրը տանջում է կանանց հղիության ընթացքում:

Եթե այրոցը բավական հաճախ է անհանգստացնում, ապա հարկավոր է անպայման բուժզննում անցնել, քանի որ այն կարող է պայմանավորված լինել առողջական որևէ խնդրով, հակառակ դեպքում խնդրից կարելի է ազատվել բնական բուժիչ միջոցների օգնությամբ:

Ձեր ուշադրությանն ենք ներկայացնում այրոցի բուժման մի քանի բնական միջոց, որոնք արդյունավետ կերպով կազատեն տհաճ զգացողություններից՝ առանց կողմնակի բարդություններ առաջացնելու:

Դափնու տերևների թուրմ

Այս բույսը նպաստում է մարսողության բարելավմանը, պաշտպանում է ստամոքսն ու կանխում է թթվայնության բարձրացումը՝ կարգավորելով ստամոքսահյութի արտազատումը: Ըմպելիքը պատրաստելու համար հարկավոր է դափնու երկու տերևն ավելացնել 300 մլ եռացող ջրին, եռացնել 3-5 րոպե, այնուհետև թրմել ևս 10-20 րոպե: Թուրմը կարելի է ընդունել օրական չորս անգամ՝ 70-100 մլ:

Երիցուկով թեյ

Երիցուկն օգնում է չեզոքացնել ստամոքսի բարձր թթվայնությամբ рН հաշվեկշիռը՝ դրանով իսկ նվազեցնելով այրոցի առաջացման հավանականությունը: Թեյը պատրաստելու համար պարզապես հարկավոր է 1 թեյի գդալ երիցուկը 10 րոպե թրմել մի բաժակ եռման ջրում: Այն կարելի է ընդունել օրական երեք անգամ՝ ուտելուց առաջ, 50-70 մլ: Այս թեյը կօգնի ավելի լավ մարսել սնունդն ու ազատվել տհաճ զգացողություններից:

Մրգեր

Այրոցից ազատվելու հիանալի միջոց են նաև թարմ մրգերը: Օրինակ՝ կարելի է մի կտոր ձմերուկը կտրատել և երկար ծամելով ուտել: Այս կերպ խթանվում է թքարտադրությունը, ինչն էլ օգնում է չեզոքացնել ստամոքսի թթուները:

Սակայն այրոցից ազատող միակ միրգը ձմերուկը չէ: Այս խնդրի դեպքում շատ արդյունավետ կարող են լինել նաև բանանը, սեխն ու խնձորը, ինչպես նաև թարմ քամած խնձորի հյութը:

Նյութի աղբյուրը՝ budetezdorovy.ru