Ինչով են պայմանավորված ցավոտ զգացողությունները դաշտանի ժամանակ և ինչպես մեղմել դրանք

Ցավոտ զգացողություններով ուղեկցվող դաշտանը շատ կանանց է ծանոթ: Առվել հաճախ ցավն աննշան է լինում, սակայն լինում են դեպքեր, երբ այն պարզապես անտանելի է դառնում՝ բացասաբար ազդելով կնոջ կյանքի որակի վրա:

Շատերին կարող է թվալ, թե սա բնական երևույթ է, մինչդեռ դիսմենորեան (ցավոտ դաշտան) խանգարում է, որի դեմ հարկավոր է պայքարել: Սակայն մինչ խնդրի դեմ պայքարելը հարկավոր է հասկանալ դրա առաջացման պատճառը: Գոյություն ունի դիսմենորեայի երկու տեսակ՝ առաջնային ու երկրորդային, և եթե առաջինը հանդիպում է ներքին սեռական օրգանների զարգացման բնածին արատով կանանց մոտ, ապա երկրորդի դեպքում խնդրի զարգացման պատճառ են դառնում կպումները փոքր կոնքում, ձվարանների կամ արգանդի ուռուցքները, էնդոմետրիոզը և այն:

Ինչ անել ցավոտ դաշտանի դեպքում

Ցավոտ զգացողություններով ուղեկցվող դաշտանի դեպքում հարկավոր է հետևել որոշակի կանոնների, որոնք կօգնեն մեղմել տհաճ զգացողությունները:

Առաջին հերթին  հարկավոր է հետևել աշխատանքի և հանգստի ժամերին, քանի որ հանգիստը կանանց կյանքի շատ կարևոր մասն է կազմում: Բացի այդ, հարկավոր է խուսափել սթրեսային իրավիճակներից, որոնք կարող են դառնալ տարատեսակ խանգարումների, այդ թվում նաև դիսմենորեայի պատճառ:

Տհաճ զգացողությունները մեղմելու համար շատ կարևոր է նաև ալկոհոլից, ծխախոտից ու սուրճից հրաժարվելը և չափավոր ֆիզիկական ակտիվությունը:

Եթե ձեռնարկված միջոցները չեն օգնում ազատվել ցավից և այն ավելի ու ավելի անտանելի է դառնում, ապա ամենաարդյունավետ միջոցը կլինի ոչ ստերոիդային հակաբորբոքային դեղամիջոցների և սպազմոլիտիկների ընդունումը:

Շատ օգտակար կարող են լինել նաև յոգան ու մեդիտացիան, ուստի կարելի է թուլացնող ու հանգստացնող վարժություններ կատարել: Բացի այդ, հարկավոր է ավելի շատ ջուր խմել և հարստացնել սննդակարգը վիտամիններով հարուստ մրգերով ու բանջարեղենով:

Երբեմն բժիշկները խորհուրդ են տալիս տաք լոգանք ընդունել մկանները թուլացնելու համար: Արդյունավետ կարող է լինել նաև ջերմակը, սակայն մինչ այն կիրառելը հարկավոր է անպայման խորհրդակցել բժշկի հետ: Բանն այն է, որ ցավոտ զգացողությունները կարող են պայմանավորված լինել բորբոքային գործընթացով, իսկ այս դեպքում ջերմակը կարող է շատ վտանգավոր լինել:

Հարկ է հիշել, որ երբեմն ցավոտ զգացողություններով ուղեկցվող դաշտանը վկայում է որևէ լուրջ խանգարման մասին, ուստի այն ոչ մի դեպքում չի կարելի անտեսել: Բացի այդ, անհանգստացնող ախտանշաններ են նաև դաշտանային ցիկլի հաճախականության ու տևողության փոփոխությունը, առատ արյունահոսությունն ու արյան մակարդուկները, ինչպես նաև արյունոտ արտադրությունը ցիկլի ընթացքում: Նման դեպքերում հարկավոր է անհապաղ դիմել գինեկոլոգին և բուժզննում անցնել էլ ավելի լուրջ խնդիրներից խուսափելու համար:

Նյութի աղբյուրը՝ medikforum.ru