Ինչ է մարդու պապիլոմավիրուսը և ինչ է հարկավոր իմանալ դրա մասին

Մարդու պապիլոմավիրուսը կարող է երկար ժամանակ լինել օրգանիզմում, սակայն որևէ ախտանշանով չարտահայտվել ու անհետանալ՝ առանց որևէ վնաս հասցնելու: Այնուամենայնիվ լինում են դեպքեր, երբ այս վիրուսը լուրջ հետևանքներ է ունենում և անգամ դառնում է քաղցկեղի զարգացման պատճառ:

Մարդու պապիլոմավիրուսը վիրուսային վարակ է, որը փոխանցվում է վարակվածի հետ շփման հետևանքով: Ընդ որում, գոյություն ունի այս վիրուսի ավելի քան 100 տեսակ, որոնք կարող են արտահայտվել ինչպես մաշկային հասարակ գորտնուկների տեսքով, այնպես էլ արգանդի վզիկում առաջացած նորագոյացությունների:

Այս վիրուսը կարող է որևէ կերպ չանդրադառնալ օրգանիզմի վրա, սակայն այն կարող է և շատ վտանգավոր լինել: Նման դեպքերում տեղեկացված լինելն աչափ կարևոր է, ուստի ձեր ուշադրությանն ենք ներկայացնում մարդու պապիլոմավիրուսի մասին ամենակարևոր փաստերը, որոնք պետք է իմանա յուրաքանչյուրը:

1. Վարակումը կարող է տեղի ունենալ անգամ մաշկի միջոցով

Շատերը կարծում են, որ մարդու պապիլոմավիրուսով հնարավոր է վարակվել միայն օրգանիզմի բնական հեղուկների միջոցով, սակայն իրականում այն կարող է փոխանցվել նաև մաշկի միջոցով:

2. Վիրուսը սովորաբար ախտանշաններ չի ունենում

Որպես կանոն այս վիրուսն անվտանգ է և վարակվածների մեծ մասի մոտ որևէ ախտանշանով չի դրսևորվում: Ընդհանուր առմամբ մարդու իմունային համակարգը կարող է հաղթահարել վարակն առանց կողմնակի օգնության: Սակայն ախտանշանների բացակայության պատճառով մարդը հաճախ գլխի չի ընկնում վիրուսի առկայության մասին, ուստի կարող է վարակել նաև մեկ ուրիշին:

3. Վիրուսը կարող է նպաստել քաղցկեղի զարգացմանը

Մարդու պապիլոմավիրուստի որոշ տեսակներ կարող են փոփոխել արգանդի վզիկի բջջային կառուցվածքն ու վերածվել քաղցկեղի: Որպես կանոն արգանդի վզիկի քաղցկեղի դեպքերի ճնշող մեծամասնությունը (98%) պայմանավորված է լինում մարդու պապիլոմավիրուսով, ուստի հարկավոր է ժամանակին բուժզննում  անցնել ու չանտեսել արտասովոր ախտանշանները: Սովորաբար քաղցկեղի այս տեսակի զարգացումը տևում է միջինում 15 տարի, ինչը նշանակում է, որ վաղ հայտնաբերման դեպքում այն կարելի է հեշտությամբ կանխել:

Սա, իհարկե, չի նշանակում, որ վարակված բոլոր կանանց մոտ կարող է քաղցկեղ զարգանալ, սակայն մասնագետները խորհուրդ են տալիս, այնուամենայնիվ, պարբերաբար բուժզննում անցնել հնարավոր խնդիրներից խուսափելու համար:

4. Անհրաժեշտ է պարբերաբար անալիզներ հանձնել

30 տարեկանը լրացած բոլոր կանայք պետք է ամպայման ԴՆԹ թեստ հանձնեն վիրուսը հայտնաբերելու համար: Բացի այդ, շատ կարևոր է նաև պարբերաբար պապ թեստ հանձնելը, որը թույլ կտա ժամանակին հայտնաբերել ախտաբանական փոփոխություններն ու քայլեր ձեռնարկել:

Ինչպես կանխել վարակումը

Մարդու պապիլոմավիրուսից խուսափելու ամենաարդյունավետ միջոցը անկանոն սեռական կապերից խուսափելն է: Բանն այն է, որ այս վարակի դեպքում պահպանակը կարող է որոշ չափով պաշտպանել, սակայն այն լիարժեք պաշտպանություն չի ապահովում, ուստի հարկավոր է շատ ուշադիր լինել զուգընկերոջ ընտրության հարցում:

Նյութի աղբյուրը՝ budetezdorovy.ru