Երեք արդյունավետ թուրմ որովայնի ցավերը մեղմելու և փորափքանքից ազատվելու համար

Որովայնի ցավերի պատճառները կարող են շատ տարբեր լինել, ուստի բարեհաջող բուժման համար հարկավոր է նախ որոշել խնդրի բնույթը:

Այս ցավերը կարող են ուղեկցվել փորափքանքով, գազերի կուտակմամբ ու այրոցով, ինչի հետևանքով դրանք էլ ավելի անտանելի են դառնում, սակայն կան արդյունավետ բնական միջոցներ, որոնք կօգնեն մեղմել ցավը:

Ձեր ուշադրությանն ենք ներկայացնում համեղ ու օգտակար թուրմեր, որոնք կօգնեն բարելավել մարսողությունը, ազատվել այրոցից և կանխել փորափքանքն ու ցավերը:

Աստղաձև անիսոնի ու երիցուկի թուրմ

Սա ամենատարածված ու արդյունավետ միջոցներից մեկն է: Այն օժտված է հիանալի հակաբորբոքային ու հանգստացնող հատկություններով, ինչի շնորհիվ օգնում է նվազեցնել ստամոքսում բորբոքային գործընթացների մակարդակն ու մեղմում է ցավը:

Ըմպելիքը պատրաստելու համար հարկավոր է մի բաժակ ջուրը եռացնել, ավելացնել մեկ հատ անիսոն ու մեկ թեյի գդալ երիցուկ, այնուհետև ծածկել տարան ու թրմել 10-15 րոպե: Օգտագործելուց առաջ թուրմը հարկավոր է քամել ու քաղցրացնել մի փոքր մեղրով:

Երիցուկի ու կոճապղպեղի թուրմ

Ե՛վ կոճապղպեղը, և՛ երիցուկն օժտված են բազմաթիվ օգտակար հատկություններով: Այս համադրությունը կօգնի զգալիորեն բարելավել մարսողական համակարգի աշխատանքն ու նվազեցնել բորբոքումների մակարդակը: Այս բուժիչ ըմպելիքը պատրաստելու համար պարզապես հարկավոր է երիցուկով թեյին մի փոքր քերիչով մանրացրած կոճապղպեղ ավելացնել:

Դաղձի, անիսոնի ու դարչնի թուրմ

Դաղձը ոչ միայն թարմացնում է, այլև օգնում է ազատվել փորափքանքից: Միևնույն ժամանակ դարչինն ու անիսոնն օժտված են հիանալի հակաբորբոքային ազդեցությամբ և նպաստում են մարսողական համակարգի աշխատանքի բարելավմանը, ինչի շնորհիվ այս ըմպելիքը համարվում է լավագույններից մեկը:

Այն պատրաստելու համար հարկավոր է 350-400 մլ ջուրը եռացնել, այնուհետև ավելացնել մի կտոր ցեյլոնյան դարչին, մեկ թեյի գդալ դաղձ և մեկ հատ աստղաձև անիսոն: Եռացնել խառնուրդը 4 րոպե, այնուհետև թրմել ևս 10 րոպե: Օգտագործելուց առաջ թուրմը հարկավոր է քամել ու քաղցրացնել մի փոքր մեղրով:

Այս բնական միջոցները կօգնեն հեշտությամբ մեղմել որովայնի ցավն ու ազատվել մարսողական խնդիրներից, սակայն հարկ է հիշել, որ առողջական լուրջ խնդիրների ու ուժեղ ցավերի դեպքում հարկավոր է անպայման խորհրդակցել բժշկի հետ, քանի որ ինքնաբուժությունը կարող է խիստ վնասակար լինել և էլ ավելի վատացնել հիվանդի վիճակը: Բացի այդ, միայն փորձառու մասնագետը կարող է ճիշտ ախտորոշել խնդիրն ու նշանակել անհրաժեշտ բուժումը, որը կլինի և՛ արդյունավետ, և՛ անվնաս:

Նյութի աղբյուրը՝ budetezdorovy.ru