Արդյունավետ բաղադրատոմսեր գաստրիտի բուժման համար

Գաստրիտը ստամոքսի լորձաթաղանթի բորբոքումն է, որը դրսևորվում է որովայնի ցավերով, փսխումով, այրոցով և այլ տհաճ ախտանշաններով: Այս հիվանդության զարգացման պատճառները տարբեր են լինում, սակայն ամենատարածվածներն են որոշակի դեղամիջոցների (օրինակ՝ ասպիրին կամ իբուպրոֆեն), ալկոհոլային ըմպելիքների և տապակած կամ վերամշակում անցած մթերքի գործածությունը, ինչպես նաև Helicobacter pylori բակտերիայի հետևանքով առաջացած վարակը:

Այս հիվանդության դեպքում հարկավոր է անհապաղ դիմել բժշկին ու սկսել բուժումը, սակայն կան մի շարք արդյունավետ բնական միջոցներ, որոնք կարող են հիանալի օգնական դառնալ գաստրիտի դեմ պայքարում: Ձեր ուշադրությանն ենք ներկայացնում դրանցից մի քանիսը:

Երիցուկով թեյ

Երիցուկն օժտված է հակաբորբոքային ու հանգստացնող հատկություններով, ինչի շնորհիվ մեղմում է ցավը, սրտխառնոցն ու փորափքանքը:

Անհրաժեշտ բաղադրիչներն են.

• 1 թեյի գդալ երիցուկ,
• 1 թեյի գդալ կանաչ թեյ,
• անանուխի մի քանի տերև,
• 1 լիտր ջուր:

Պատրաստման եղանակը.

Բույսերը լցնել թերմոսի մեջ, ավելացնել 1 լիտր շատ տաք ջուր, 15 րոպե թրմել, այնուհետև քամել: Գաստրիտի ժամանակ ցավի նոպաները կանխելու համար օրական հարկավոր է խմել 1-2 բաժակ երիցուկով թեյ, իսկ ախտանշաններից ազատվելու համար՝ 2-3 բաժակ:

Կոճապղպեղով թեյ

Իր հակաբակտերիալ ու հակաբորբոքային հատկությունների շնորհիվ կոճապղպեղն օգնում է ազատվել այտուցներից ու ցավից: Սա է պատճառը, որ այն հաճախ օգտագործվում է ստամոքսի և աղիների հետ կապված խնդիրներից ազատվելու համար:

Անհրաժեշտ բաղադրիչներն են.

• 1 թեյի գդալ թարմ կոճապղպեղի քերուկ,
• 1 լիտր ջուր,
• մի փոքր մեղր,

Պատրաստման եղանակը.

Եռացող ջրին ավելացնել կոճապղպեղի քերուկն ու վերցնել կաթսան կրակից: Թրմել 15 րոպե, այնուհետև ավելացնել մեղրն ու խմել ըմպելիքը փոքր կումերով: Թեյը հարկավոր է խմել օրական 1 բաժակ, բուժման կուրսը տևում է մեկ շաբաթ:

Դաղձով թեյ

Այս բույսը հայտնի է իր հաճելի թարմ համով, սակայն այն նաև հիանալի բուժիչ միջոց է: Իր հակաբակտերիալ, հանգստացնող ու հակաբորբոքային հատկությունների շնորհիվ այն օգնում է նվազեցնել բորբոքման մակարդակն ու մեղմել ցավը:

Անհրաժեշտ բաղադրիչներն են.

• 1 թեյի գդալ դաղձի տերև,
• 400 մլ ջուր,
• մի փոքր մեղր:

Պատրաստման եղանակը.

Ջուրը եռացնել, ավելացնել դաղձի տերևները, այնուհետև վերցնել կրակից ու թողնել թրմվի: Պատրաստի թուրմը քամել, ավելացնել մեղրն ու խմել: Թեյը հարկավոր է խմել օրական երկու անգամ ուտելուց հետո:

Նյութի աղբյուրը՝ budetezdorovy.ru