Որ մթերքը կարող է դառնալ այտուցների առաջացման պատճառ

18:26 • 18.04.19

Այտուցների առաջացման հիմնական պատճառն օրգանիզմում հեղուկի կուտակումն է, որն էլ պայմանավորված է լինում տարբեր գործոններով: Այդ գործոնների շարքին է դասվում անգամ մարդու սննդակարգը, ուստի ձեր ուշադրությանն ենք ներկայացնում սննդամթերքի այն տեսակները, որոնց գործածությունը երեկոյան ժամերին կարող է առավոտյան հանգեցնել այտուցների առաջացման:

Մասնագետների խոսքով՝ այտուցների առաջացման ամենատարածված պատճառն ու գեղեցկության հիմնական «թշնամին» ալկոհոլն է: Բանն այն է, որ ոգելից խմիչքներն ազդում են օրգանիզմում հեղուկի տեղաբաշխման գործընթացի վրա, ինչի հետևանքով այն կուտակվում է հյուսվածքներում: Միաժամանակ այս ըմպելիքները նպաստում են օրգանիզմի ջրազրկմանը, քանի որ ալկոհոլից ազատվելու համար օրգանիզմին ավելի շատ հեղուկ է հարկավոր:

Առավոտյան այտուցների պատճառ կարող է դառնալ նաև ընթրիքին աղի մթերքի գործածությունը, հատկապես, եթե դրանում աղը համադրված է նատրիումի գլուտամատ համի ուժեղացուցիչի հետ: Մեծ քանակությամբ նատրիումի պատճառով տեղի է ունենում հեղուկի դիսբալանս, ինչն էլ դառնում է այտուցների պատճառ: Սա է պատճառը, որ հարկավոր է հրաժարվել արագ սննդից, կիսաֆաբրիկատներից ու ցանկացած պատրաստի մթերքից: Բացի այդ, պետք չէ օգտագործել նաև տարատեսակ մարինացված ու պահածոյացված մթերք, քանի որ դրանք հարուստ են լինում ինչպես մեծ քանակությամբ աղով, այնպես էլ շաքարով ու քացախով, իսկ այս բոլոր բաղադրիչները նպաստում են այտուցների առաջացմանը:

Այտուցներ կարող են առաջանալ նաև քաղցրավենիքի գործածության դեպքում, քանի որ նման մթերքը ոչ միայն շատ քաղցր է, այլև ճարպոտ, ինչը լավագույն համադրությունը չէ ընթրիքի համար: Այս դեպքում օրգանիզմին մեծ քանակությամբ հեղուկ է պետք այն յուրացնելու համար:

Այտուցներից խուսափելու և ընթրիքից առավելագույնս օգուտ ստանալու համար հարկավոր է նախապատվությունը տալ միայն առողջարար մթերքին: Նման դեպքերում լավագույն ընտրությունը կլինի ձուկը, բանջարեղենը, անյուղ միսը, ծովամթերքը, անյուղ կաթնամթերքը, մրգերը կամ ընկուզեղենը:

Նյութի աղբյուրը՝ med2.ru