Ժողովրդական բաղադրատոմսեր մազաթափությունից ազատվելու և վարսերն անհրաժեշտ սննդարար նյութերով սնուցելու համար

Մարդն ամեն օր կորցնում է որոշակի քանակությամբ մազ, ինչն օրգանիզմի բնական գործընթացներից է, սակայն երբեմն մազաթափությունն առավել ինտենսիվ է դառնում: Սա կարող է բավական տհաճ խնդիր դառնալ յուրաքանչյուրի համար, ուստի մարդիկ փորձում են ամեն կերպ ազատվել դրանից:

Մազաթափությունը կարող է պայմանավորված լինել ամենատարբեր պատճառներով, այդ թվում նաև սթրեսով, դեղորայքի ընդունմամբ, սխալ սննդակարգով ու հարդարման սխալ մեթոդների կիրառմամբ: Այս խնդրից ազատվելու համար հարկավոր է նախ ազատվել դրա առաջացման պատճառից, սակայն միայն դա կարող է բավական չլինել:

Գոյություն ունեն մազաթափության կանխման համար նախատեսված բազմաթիվ կոսմետիկ միջոցներ, սակայն դրանք ոչ միշտ են արդյունավետ լինում, մինչդեռ կան նաև ժողովրդական բաղադրատոմսեր, որոնք ոչ միայն արդյունավետ են, այլև բացարձակապես անվնաս: Ձեր ուշադրությանն ենք ներկայացնում դրանից երկուսը:

Խնձորի քացախ ու եղեսպակի եփուկ

Խնձորի քացախը պարունակում է ծծումբ, որը շատ օգտակար է գլխամաշկի ու մազերի համար, իսկ եղեսպակը մազերի աճը խթանող ու ֆոլիկուլներն ակտիվացնող հիանալի միջոց է:

Պարզապես հարկավոր է մի բաժակ եղեսպակի եփուկին ավելացնել 3 ճաշի գդալ խնձորի քացախ և օգտագործել լուծույթը մաքուր մազերը մաքրաջրելու համար: Այս խառնուրդը կարելի է պատրաստել նաև մեծ քանակությամբ և մինչև 2 շաբաթ պահել այն սառնարանում:

Այս մեթոդը խորհուրդ չի տրվում կիրառել բաց գույնի մազերի դեպքում, քանի որ եղեսպակի եփուկը կարող է փոխել վարսերի գույնը: Միևնույն ժամանակ այն կօգնի ներկել ճերմակած մազերը:

Գազար ու յուղեր

Գազարի հյութը հարուստ է հակաօքսիդանտներով ու վիտամիններով (B6 և B12), ինչի շնորհիվ այն առողջացնում է վարսերն ընդամենը մի քանի օրում: Միևնույն ժամանակ բուսայուղերը դրական ազդեցություն են ունենում գլխամաշկի ու վարսերի վրա՝ խթանելով մազերի աճն ու առողջ փայլ հաղորդելով դրանց:

Խառնել հավասար քանակությամբ գազարի հյութն ու ձիթայուղը (կարելի է օգտագործել նաև նշի յուղ կամ գերչակի յուղ), ստացված խառնուրդը քսել վարսերին, թողնել 15 րոպե, այնուհետև լվանալ գլուխը գոլ ջրով ու շամպունով:

Այս բնական միջոցները ոչ միայն խթանում են մազերի աճը, այլև բարելավում են դրանց որակն ու սնուցում են անհրաժեշտ օգտակար նյութերով: Բացի այդ, դրանց շնորհիվ կարելի է ավելի հեշտ հարդարել վարսերը՝ առանց քիմիական տարրերով հարուստ հարդարման միջոցներ կիրառելու:

Նյութի աղբյուրը՝ budetezdorovy.ru