Ինչպես է վիտամինների դեֆիցիտն անդրադառնում մարդու արտաքինի վրա

Ձմռանը թարմ մրգերի ու բանջարեղենի պակասը համարվում է վիտամինների պակասի հիմնական պատճառը: Բացի այդ, իր ազդեցությունն է ունենում նաև արևի լույսի պակասը, ուստի զարմանալի չէ, որ գարնանային ավիտամինոզը բավական տարածված խնդիր է:

Վիտամինների ու հանքանյութերի դեֆիցիտը կարող է դրսևորվել տարբեր ախտանշաններով, որոնք մարդիկ հաճախ բնութագրում են այլ խնդիրներին: Ձեր ուշադրությանն ենք ներկայացնում այս կարևոր տարրերի պակասի մասին վկայող 5 ախտանշան, որոնք կարելի է նկատել՝ պարզապես հայելու մեջ նայելով:

1. Մաշկի չորություն ու գունատություն

Մաշկի գունատությունն ու չորությունը, մշտական հոգնածությունն ու տրամադրության անկումը կարող են վկայել A, C և B խմբի վիտամինների դեֆիցիտի մասին: Նման դեպքերում խորհուրդ է տրվում հարստացնել սննդակարգը հավկիթով, բրյուսելյան կաղամբով, արևածաղկի սերմերով, ընկուզեղենով, կանաչ ու նարնջագույն բանջարեղենով ու մրգերով, բրոկոլիով, կիվիով ու կարմիր պղպեղով:

2. Բերանում առաջացած փոքրիկ վերքեր

Այս խնդիրը հաճախ պայմանավորված է լինում երկաթի, ցիկի ու B խմբի վիտամինների պակասով, որը կարելի է լրացնել ավելի շատ հավկիթ, թունա ձուկ, չորացրած լոլիկ, գետնանուշ ու լոբազգիներ օգտագործելով: Բացի այդ, կարելի է նաև հարստացնել սննդակարգը վիտամին C պարունակող մթերքով:

3. Բշտիկներ ու բծեր

Բշտիկներն ու բծերը կարող են վկայել A և D վիտամինների, ինչպես նաև ճարպաթթուների պակասի մասին: Այս խնդրից ազատվելու համար խորհուրդ է տրվում օգտագործել սաղմոն, հունական ընկույզ, նուշ, գազար ու կարմիր պղպեղ (ոչ կծու):

4. Մազաթափություն

Այս ախտանշանը սովորաբար պայմանավորված է լինում վիտամին В7-ի (բիոտին) դեֆիցիտով և հաճախ ուղեկցվում է տրամադրության անկումով, անտարբերությամբ ու քնկոտությամբ: Բիոտինի դեֆիցիտը կարող է լինել ինչպես սխալ սննդակարգի հետևանքով, այնպես էլ հակաբիոտիկների գործածության: Այս վիտամինով հարուստ են ձվի դեղնուցը, ավոկադոն, ծաղկակաղամբը, բանանն ու պնդուկը:

5. Այտուցներ ու աչքերի ուռածություն

Չնայած, որ այս ախտանշանները հաճախ պայմանավորված են լինում ամենատարբեր խնդիրներով, դրանք կարող են վկայել նաև վիտամին K-ի և երկաթի դեֆիցիտի մասին: Եթե պատճառը սխալ սննդակարգն է, ապա հարկավոր է հարստացնել սննդակարգը բրոկոլիով, բրյուսելյան կաղամբով, կաղամբով, հավի մսով, չամիչով, մաղադանոսով ու ոսպով:

Նյութի աղբյուրը՝ budetezdorovy.ru