Որոնք են կրծքագեղձի քաղցկեղի վաղ փուլերի առաջին ախտանշանները

Կրծքագեղձի քաղցկեղը համարվում է քաղցկեղի ամենատարածված տեսակներից մեկը: Այս հիվանդությունն ախտորոշվում է միլիոնավոր կանանց մոտ: Այն սովորաբար զարգանում է 40 տարեկանից հետո, իսկ տարիքի հետ դրա զարգացման հավանականությունը միայն աճում է: Սա է պատճառը, որ հարկավոր է հաճախ բուժզննում անցնել և չանտեսել արտասովոր ախտանշանները, ինչը թույլ կտա հայտնաբերել խնդիրը զարգացման վաղ փուլերում ու կբարձրացնի բարեհաջող բուժման հավանականությունը:

Այս հիվանդությունը զարգացման վաղ փուլերում չի դրսևորվում ակնհայտ ախտանշաններով, ուստի հաճախ հայտնաբերվում է, երբ ուռուցքն արդեն բավական մեծ է լինում: Սակայն վառ ախտանշանների բացակայությունը դեռ չի նշանակում, որ այն առհասարակ որևէ կերպ չի դրսևորվում:

Կրծքագեղձի քաղցկեղի առաջին ախտանշանները սովորաբար չեն ուղեկցվում ցավով, ուստի հաճախ անտեսվում են: Ամենատարածված ախտանշանը պնդացումների առկայությունն է, սակայն այս ախտանշանը կարող է հայտնաբերվել շատ ուշ: Սա է պատճառը, որ հարկավոր է տարբերել նաև հիվանդության մյուս ախտանշաններն ու ժամանակին բուժզննում անցնել: Այդ ախտանշանների շարքին են դասվում.

Մեջքի ցավերը

Քաղցկեղի այս տեսակի զարգացմանն ուղեկցող ամենատարածված ախտանշաններից մեկը մեջքի ցավերն են: Թիակների ստորին հատվածի ցավն ու մկանային ցավ հիշեցնող տհաճ զգացողությունները կարող են պայմանավորված լինել առաջին աստիճանի քաղցկեղով, ուստի հարկավոր է շատ ուշադիր լինել:

Ցավը, կարմրածությունը կամ քորը

Հաճախ դաշտանի ժամանակ կուրծքն ավելի զգայուն է դառնում և ի հայտ են գալիս ցավոտ զգացողություններ, սակայն եթե այս ախտանշանը պահպանվում է երկար ժամանակ, ապա այն կարող է վկայել ավելի լուրջ խնդիրների մասին: Բացի այդ, ուռուցքի առկայության մասին կարող են վկայել նաև կրծքի ջերմաստիճանի բարձրացումը, մաշկի անհարթությունն ու ոչ մեծ կապույտ բծերի առաջացումը:

Ցավը թևատակերի հատվածում

Ավշային հանգույցների բորբոքումը նույնպես չպետք է անուշադրության մատնվի: Քաղցկեղի զարգացման դեպքում թևատակերում գտնվող ավշային հանգույցները սովորաբար առաջինն են արձագանքում ուռուցքի առկայությանը, ուստի ցանկացած բորբոքման կամ տհաճ զգացողության դեպքում հարկավոր է բուժզննում անցնել:

Պտուկների փոփոխությունը կամ արտադրությունը

Շատ կարևոր է նաև պտուկների վիճակը: Բժիշկները նախացգուշացնում են, որ պտուկների հետ կապված ցանկացած փոփոխություն կարող է պայմանավորված լինել կրծքագեղձի քաղցկեղով: Եթե կուրծքը փոխում է իր ձևը, գույնը, զգայունության աստիճանը կամ ի հայտ են գալիս նորագոյացություններ, պնդացումներ կամ արտադրություն (սպիտակավուն կամ արյունոտ հեղուկ), ապա հարկավոր է անհապաղ բուժզննում անցնել:

Կրծքագեղձերի արտաքին տեսքի փոփոխությունը

Կրծքագեղձի քաղցկեղի մասին կարող է վկայել նաև կրծքի ձևի կամ արտաքին տեսքի փոփոխությունը: Նման դեպքերում հարկավոր է անպայման խորհրդակցել բժշկի հետ և անհրաժեշտության դեպքում բուժզննում անցնել:

Կրծքագեղձի քաղցկեղը ժամանակին հայտնաբերելու համար մասնագետները խորհուրդ են տալիս շաքաբաթական գոնե մեկ անգամ ինքնուրույն հետազոտել կուրծքը: Նշված ախտանշանները կօգնեն հայտնաբերել քաղցկեղը զարգացման վաղ փուլերում՝ դրանով իսկ բարձրացնելով բարեհաջող բուժման հավանականությունը:

Այնուամենայնիվ բժիշկները հիշեցնում են, որ այս ախտանշանները ոչ միշտ են վկայում կրծքագեղձի քաղցկեղի մասին: Երբեմն դրանք պայմանավորված են լինում առողջական ոչ շատ լուրջ խնդիրներով կամ հորմոնալ փոփոխություններով, ուստի հստակ ախտորոշման համար հարկավոր է դիմել բժշկին: Բացի այդ, ոչ մի դեպքում չի կարելի խուճապի մատնվել, քանի որ դա կարող է բացասաբար ազդել բուժման ընթացքի վրա:

Նյութի աղբյուրը՝ budetezdorovy.ru