10 արտասովոր պատճառ, որոնցով կարող է պայմանավորված լինել բերանի խոռոչի տհաճ հոտը

Բերանի խոռոչի տհաճ հոտը կամ հալիտոզը սովորաբար զարգանում է տարատեսակ միկրոօրգանիզմների կենսագործունեության հետևանքով, ուստի այս խնդրից կարելի է ազատվել բերանի խոռոչի հիգիենային հետևելով: Սակայն կան սխալներ, որոնք մարդիկ հաճախ են թույլ տալիս, ինչը նպաստում է այդ միկրոօրգանիզմների բազմացմանը: Ընդ որում, առաջին հայացքից դրանք որևէ կապ չեն ունենում բերանի խոռոչի տհաճ հոտի խնդրի հետ:

Սպիտակուցներով հարուստ սննդակարգ

Մարդկային լեզուն ունի բազմաթիվ անհարթություններ ու խորը հատվածներ, որոնցում կարող են զարգանալ բակտերիաները: Այդտեղ կարող են հայտնվել նաև սպիտակուցային սննդի մնացորդներ, իսկ սպիտակուցները տարրալուծելիս բակտերիաները տհաճ հոտով գազեր են արձակում:

Բերանի խոռոչի չորություն

Թքի պակասը կարող է պայմանավորված լինել տարբեր պատճառներով, այդ թվում՝ որոշակի դեղորայքի ընդունմամբ, տարիքային առանձնահատկություններով, օրգանիզմի ջրազրկմամբ, ծխախոտի չարաշահմամբ և այլն: Այս խնդրի դեպքում բերանի խոռոչում աճում է տհաճ հոտի պատճառ հանդիսացող բակտերիաների թիվը:

Ցիտրուսային մրգեր

Ցիտրուսային մրգերը շատ համեղ են ու օգտակար, սակայն դրանք պարունակում են մեծ քանակությամբ շաքար, ինչը հիանալի սնունդ է բերանի խոռոչի բակտերիաների համար: Սա է պատճառը, որ նման մրգերի գործածությունից հետո հաճախ նկատվում է բերանի խոռոչի տհաճ հոտ:

Գետնանուշի մածուկ

Գենտնանուշի մածուկը, ինչպես և ցիտրուսային մրգերը, նույնպես հարուստ է շաքարով, ուստի կարող է դառնալ բերանի խոռոչի տհաճ հոտի պատճառ:

Նշագեղձերի «խցաններ»

Մարդու նշագեղձերն ունեն բնական խոռոչներ, որոնցում կարող են սննդի մնացորդներ կուտակվել: Դրանցում է կուտակվում նաև թարախը, որն առաջանում է, երբ նշագեղձերը պայքարում են մանրէների դեմ: Արդյունքում առաջանում են այսպես կոչված «խցաններ», որոնք ոչ միայն շատ տհաճ հոտ ունեն, այլև կարող են դառնալ նշիկաբորբի պատճառ:

Հարբուխ

Գերսառեցման, մրսածության կամ ալերգիաների դեպքում քթի խոռոչում տեղի է ունենում լորձի կուտակում, ինչը նույնպես կարող է դառնալ բերանի խոռոչի տհաճ հոտի պատճառ:

Քրոնիկ գաստրոէզոֆագիալ ռեֆլյուքս

Ստամոքսի պարունակության հետհոսքը դեպի կերակրափող կարող է դառնալ ոչ միայն այրոցի, այլև բերանի խոռոչի տհաճ հոտի պատճառ: Եթե այս ախտանշանն ի հայտ է գալիս ամեն անգամ սնվելուց հետո, ապա հարկավոր է անհապաղ դիմել բժշկին:

Շաքարային դիաբետ ու կետոդիետաներ

Շաքարային դիաբետի ու կետոդիետաների դեպքում կողմնակի բարդություններից մեկը կարող է լինել այսպես կոչված «ացետոնային շնչառությունը»: Շաքարային դիաբետի դեպքում կարող է նկատվել քաղցր հոտ, ինչը պայմանավորված է հիվանդի արյան մեջ շաքարի բարձր մակարդակով:

Ալկոհոլային ըմպելիքներ

Ալկոհոլի պարբերաբար գործածությունը նպաստում է բերանի խոռոչի միկրոֆլորայի բալանսի փոփոխությանը, ինչի հետևանքով տհաճ հոտի պատճառ հանդիսացող բակտերիաների թվը հաճախ զգալիորեն աճում է:

Կաթով սուրճ

Սուրճի հոտն ամենատհաճ հոտը չէ, քանի որ թուքն ու սուրճը չեզոքացնում են միմյանց, սակայն պատկերը բոլորովին այլ է լինում, եթե սուրճը կաթ է պարունակում: Կաթի մեջ պարունակվող ամինաթթուների առկայությունը բերանի խոռոչի ջրազրկման հետ մեկտեղ կարող է դառնալ իսկապես տհաճ հոտի պատճառ:

Նյութի աղբյուրը՝ life.ru