Ինչ է կոնյունկտիվիտը և որոնք են դրա առաջացման պատճառները, տեսակներն ու ախտանշանները

17:12 • 29.04.19

Շաղկապենաբորբը կամ կոնյունկտիվիտը, որը հայտնի է նաև որպես «վարդագույն աչք», աչքի լորձաթաղանթի բորբոքումն է: Այս հիվանդության դեպքում աչքը ստանում է վարդագույն կամ կարմիր երանգ, ինչի հետևանքով էլ հիվանդությունը ստացել է իր անվանումը:

Կոնյունկտիվիտի զարգացման պատճառ կարող են դառնալ.

մրսածությունը,

տարբեր գրգռիչները,

աղտը,

շամպունն ու օճառը,

արտասուքը,

ալերգիաները,

սնկերը,

բակտերիաները:

Այս հիվանդությունը լինում է մի քանի տեսակի, որոնք տարբերվում են ինչպես ախտահարման պատճառով, այնպես էլ հիվանդության ընթացքով:

Վիրուսային կոնյունկտիվիտը պայմանավորված է լինում վիրուսային վարակով, ինչպիսին է մրսածությունը: Շաղկապենաբորբի այս տեսակը խիստ վարակիչ է և հեշտությամբ է փոխանցվում հիվանդից առողջին: Ընդ որում, այս դեպքում հաճախ ախտահարվում է միայն մի աչքը:

Ալերգիկ կոնյունկտիվիտի զարգացման պատճառը ալերգիան է կամ ալերգենի հետ շփումը:

Բակտերիալ կոնյունկտիվիտի պատճառը բակտերիալ վարակն է, ինչպիսին է խլամիդիոզը: Հիվանդության այս տեսակը նույնպես խիստ վարակիչ է:

Քիմիական կոնյունկտիվիտը զարգանում է աչքի մեջ որևէ գրգռող նյութի հայտնվելու դեպքում: Նման նյութ կարող են լինել օճառը, շամպունը և այլն:

Կոնյունկտիվիտի ախտանշաններն են.

ախտահարված աչքի կարմրությունը,

գրգռվածությունը,

քորը,

աչքի մեջ օտար մարմնի առկայության զգացողությունը,

արցունքահոսությունը,

կանաչավուն կամ դեղնավուն երանգով արտադրությունը,

գիշերվա ժամերին առատ արտադրությունը, ինչը թույլ չի տալիս բացել աչքն առավոտյան,

լուսազգայունությունը,

«մշուշոտ» տեսողությունը:

Կոնյունկտիվիտի բուժումը

Հիվանդության բուժումը որոշվում է ըստ հիվանդության տեսակի: Բակտերիալ կոնյունկտիվիտի դեպքում հաճախ նշանակվում են հակաբիոտիկային ազդեցությամբ աչքերի կաթիլներ, մինչդեռ ալերգիկ կոնյունկտիվիտը բուժում են հակահիստամինային դեղերով: Վիրուսային ու քիմիական կոնյունկտիվիտները որպես կանոն բուժելու կարիք չի լինում և դրանք անցնում են առանց որևէ միջամտության:

Սակայն կոնյունկտիվիտի ամենավտանգավոր տեսակը քրոնիկականն է, որը հաճախ զարգանում է արտաքին միջավայրի ագրեսիվ ազդեցության հետևանքով:

Այս հիվանդության դեպքում հարկավոր է անպայման դիմել բժշկին ու հետևել բոլոր ցուցումներին, սակայն ավանդական բուժման հետ մեկտեղ կարելի է կիրառել նաև ժողովրդական միջոցներ, որոնք ոչ պակաս արդյունավետ են:

Առաջին հերթին շատ արդյունավետ է ծառանման հալվեի չորացրած տերևների թուրմը, որն օգտագործվում է ախտահարված աչքի լվացումների համար: Բացի այդ, կարելի է նաև օգտագործել բույսի թարմ հյութը, սակայն միայն եռացրած (ոչ տաք) ջրին խառնած:

Բացի այդ, աչքերը կարելի է լվանալ նաև տերեփուկի ծաղիկների կամ տուղտի թուրմով: Ոչ պակաս արդյունավետ է մեղրը, որը նաև հիանալի միջոց է գլաուկոմայի կանխարգելման համար:

Նյութի աղբյուրը՝ budetezdorovy.ru