5 պատճառ սննդակարգում կարտոֆիլ ներառելու համար. կարտոֆիլի ամենաօգտակար հատկությունները

10:45 • 29.04.19

Շատերը կարտոֆիլը համարում են վնասակար մթերք, որը ոչ միայն առանձնապես օգտակար չէ, այլև նպաստում է քաշի ավելացմանը, իսկ երբեմն էլ կարող է առողջական լուրջ խնդիրների պատճառ դառնալ: Սակայն իրականում կարտոֆիլը բավական օգտակար մթերք է, որի չափավոր գործածությունը կարող է ազատել տարբեր խնդիրներից:

Ձեր ուշադրությանն ենք ներկայացնում 5 պատճառ կարտոֆիլից չհրաժարվելու համար:

Կատոֆիլը հարուստ է սրտի համար շատ օգտակար կալիումով

Կալիումի պակասի դեպքում մեծանում է սրտամկանի վրա գործադրվող ծանրաբեռնվածությունը և բարձրանում է սրտի վնասվածքների հավանականությունը: Բացի այդ, կալիումը նպաստում է օրգանիզմից հեղուկի ավելցուկի դուրսբերմանը՝ դրանով իսկ պաշտպանելով այտուցներից ու երիկամների հիվանդություններից:

Կարտոֆիլը պարունակում է մեծ քանակությամբ վիտամին C

Մոտ 400 գրամ խաշած կարտոֆիլը պարունակում է օրգանիզմին անհրաժեշտ վիտամին C-ի օրական նորման: Ընդ որում, վիտամին C-ով առավել հարուստ է թարմ կարտոֆիլը, մինչդեռ երկար ժամանակ պահվելու դեպքում դրանում պարունակվող ասկորբինաթթուն սկսում է քայքայվել, և պահպանվում է միայն վիտամին C-ի 1/3 մասը:

Կարտոֆիլն ամինաթթուների հիանալի աղբյուր է

Մարդկային օրգանիզմի սպիտակուցները կազմվում են ամինաթթուներից: 20 ամինաթթվից կարտոֆիլում պարունակվում են 14-ը, և դրանց թվում կան մի շարք անփոխարինելի ամինաթթուներ, որոնք օրգանիզմը չի կարող ինքնուրույն արտադրել:

Կարտոֆիլն օգնում է նվազեցնել զարկերակային ճնշումը

Ամերիկացի գիտնականների անցկացրած գիտափորձը ցույց է տվել, որ ամսվա ընթացքում 6-8 հատ չկեղևազրկված ու ջեռոցում եփված կարտոֆիլի օգտագործումն առանց աղի ու յուղի չի դառնա քաշի ավելացման պատճառ, սակայն կարող է նպաստել ավելորդ քաշով մարդկանց զարկերակային ճնշման նվազմանը:

Կարտոֆիլը բարելավում է ինքնազգացողությունն աղեստամոքսային տրակտի խնդիրների դեպքում

Աղեստամոքսային տրակտի հիվանդություններով (խոցային հիվանդություն, գաստրիտ և այլն) մարդկանց համար կարտոֆիլը կարող է յուրահատուկ բուժիչ միջոց դառնալ: Այս բանջարեղենն օժտված է հակաբորբոքային հատկություններով, ինչի շնորհիվ բարելավում է ինքնազգացողությունն անգամ այս հիվանդությունների սրման դեպքում:

Նյութի աղբյուրը՝ medikforum.ru