7 խորհուրդ քաղցկեղից խուսափելու համար

18:21 • 01.05.19

Քաղցկեղը համարվում է ամենավտանգավոր հիվանդություններից մեկը, որի կանխարգելումն ու բուժումը վաղ փուլերում շատ ավելի հեշտ է, քան հետագայում դրա մի շարք բարդությունների դեմ պայքարելը: Նման խնդիրներից խուսափելու համար հարկավոր է սովորել տարբերել հիվանդության ախտանշաններն ու խուսափել քաղցկեղի զարգացմանը նպաստող գործոններից:

Ձեր ուշադրությանն ենք ներկայացնում մի քանի արդյունավետ խորհուրդ, որոնք կօգնեն խուսափել այս վտանգավոր հիվանդությունից:

Հրաժարվել ծխախոտից

Այս վնասակար սովորություն հաճախ դառնում է թոքերի ու կոկորդի քաղցկեղի զարգացման պատճառ: Ընդ որում, որքան շատ է մարդը ծխում, այնքան բարձր է հիվանդության զարգացման հավանականությունը: Հետազոտությունները ցույց են տվել, որ օրական մեկ տուփ ծխախոտից ավելի ծխողների մոտ թոքերի քաղցկեղի զարգացման հավանականությունը 15-25 անգամ ավելի բարձր է, քան չծխողների մոտ, իսկ ծխախոտը չարաշահողների մոտ այդ հավանականությունը բարձրանում է 60 անգամ:

Սահմանափակել արևի ճառագայթների ներքո անցկացրած ժամանակը

Մասնագետները խորհուրդ են տալիս սահմանափակել արևի ճառագայթների տակ անցկացրած ժամանակն ու տրամադրել դրան օրական 15-30 րոպե: Ընդ որում, անգամ այդ դեպքում հարկավոր է անպայման արևապաշտպան քսուք օգտագործել, այլապես բարձր է մաշկի քաղցկեղի զարգացման հավանականությունը:

Հետևել քաշին

Որոշ հետազոտություններ ցույց են տվել, որ ճարպակալման ու քաղցկեղի որոշ տեսակների միջև կա ակնհայտ կապ: Ավելորդ քաշը, մասնավորապես, բարձրացնում է հաստ աղիքի քաղցկեղի, ուղիղ աղիքի քաղցկեղի, լեղապարկի քաղցկեղի, ենթաստամոքսային գեղձի քաղցկեղի և կրծքագեղձի քաղցկեղի զարգացման հավանականությունը:

Հետևել սննդակարգին

Առողջ սննդակարգը շատ կարևոր է առողջության պահպանման համար: Հարկավոր է օգտագործել ավելի շատ ամբողջահատիկ մթերք, թարմ մրգեր ու բանջարեղեն և բացառել վերամշակում անցած մսամթերքն ու կարմիր միսը: Բացի այդ, խիստ վտանգավոր է նաև ապխտած մթերքը, որի պատրաստման համար օգտագործվող նյութերը պարունակում են քաղցկեղածին տարրեր:

Լինել ֆիզիկապես ակտիվ

Նստակյաց կենսակերպը բարձրացնում է քաղցկեղի զարգացման հավանականությունը, մինչդեռ օրական ընդամենը 1.5 ժամ ֆիզիկապես ակտիվ լինելը բավական է այս վտանգավոր հիվանդության կանխարգելման համար:

Սահմանափակել ալկոհոլը

Ալկոհոլի գործածությունից հետո էթանոլի տարրալուծման հետևանքով օրգանիզմում առաջանում է ացետալդեհիդ, որը կարող է դառնալ ստամոքսի, լյարդի, բերանի խոռոչի, կոկորդի և ըմպանի ուռուցքների զարգացման պատճառ:

Վերահսկել տարածքում ռադոնի մակարդակը

Այս ռադիոակտիվ գազն առաջանում է ուրանից, որն էլ իր հերթին գտնվում է քարերի ու հողի մեջ: Այն խիստ վտանգավոր քաղցկեղածին տարր է, սակայն օդում դրա պարունակությունը երրորդ հարկից բարձր տարածքներում աննշան է: Այնուամենայնիվ այս տարրի մակարդակն օդում նվազեցնելու համար բավական է տարածքը պարբերաբար օդափոխել:

Նյութի աղբյուրը՝ healthinfo.ua