Առողջական 8 խնդիր, որոնք թույլ չեն տալիս մարդուն կենտրոնանալ

Հիշողության վատացումը, ուշադրությունը կենտրոնացնելու անկարողությունը, վատ տրամադրությունն ու հոգնածությունը վկայում են կոգնիտիվ խանգարումների մասին: Այլ կերպ ասած՝ այս ամենը պայմանավորված է գլխուղեղի հետ կապված խնդիրներով, որոնք էլ իրենց հերթին կարող են պայմանավորված լինել ամենատարբեր խանգարումներով:

Ձեր ուշադրությանն ենք ներկայացնում առողջական 8 խնդիր, որոնք թույլ չեն տալիս մարդուն կենտրոնանալ:

Անհանգստություն

Եթե անհանգստությունն ունի որոշակի պատճառ, ապա ամեն ինչ բնական է, սակայն եթե այն պայմանավորված չէ որևէ խնդրով և դրա պատճառն անհայտ է, ապա հարկավոր է միջոցներ ձեռնարկել: Եթե այս վիճակը քրոնիկ բնույթ է ստանում, ապա այն կարող է հանգեցնել մտքերի խառնաշփոթի և կոգնիտիկ կարողությունների ու կենտրոնացման թուլացման:

Դեղորայքի առաջացրած կողմնակի բարդություններ

Որոշ դեղամիջոցներ կարող են դառնալ հիշողության մասնակի կորստի և «գլխում մշուշի» զգացողության պատճառ, ինչը հատկապես ակնհայտ է լինում տարեցների մոտ: Նման կողմնակի բարդությունները բնորոշ են առաջին հերթին հանգստացնող, հակաջղաձգումային, ինչպես նաև ուժեղ ազդեցությամբ ցավազրկող դեղամիջոցներին:

Անքնություն

Քնի խանգարումները նույնպես կարող են դառնալ բազում խնդիրների պատճառ: Այս դեպքում առաջին հերթին տուժում են հիշողությունն ու կոգնիտիվ կարողությունները, սակայն գլխուղեղն անքնության միակ «զոհը» չէ: Գիտնականները վաղուց ապացուցել են, որ անքնության ու սրտանոթային հիվանդությունների միջև կա ուղղակի կապ:

Երկաթի դեֆիցիտ

Երկաթը մարդու օրգանիզմում կատարում է կարևորագույն գործառույթներից մեկը՝ օգնելով թթվածինը թոքերից մատակարարել այլ օրգաններին, այդ թվում՝ գլխուղեղին: Սա է պատճառը, որ այս տարրի պակասը կարող է դառնալ գլխուղեղի աշխատանքի վատացման պատճառ: Երկաթի դեֆիցիտի մասին հուշող այլ ախտանշանների շարքին են դասվում ձեռքերի ու ոտքերի սառնությունը, սրտի զարկերի արագացումն ու լեզվի ցավը:

Վիտամին B12-ի դեֆիցիտ

Այս վիտամինի դեֆիցիտը նույնպես կարող է հանգեցնել կոգնիտիվ կարողությունների վատացման: Այս խնդրի մասին հուշող այլ ախտանշանների շարքին են դասվում վերջույթների թմրածությունն ու թուլության զգացողությունը, իսկ ռիսկային խմբում են տարեցներն ու կենդանական ծագման մթերքից հրաժարվող մարդիկ:

Քրոնիկ հոգնածություն

Քրոնիկ հոգնածության համախտանիշն ունի բազմաթիվ ախտանշաններ, և դրանց թվում են գլխացավերը, ինչպես նաև կարճատև հիշողության ու ուշադրության կենտրոնացման հետ կապված խնդիրները:

Ֆիբրոմիալգիա

Ֆիբրոմիալգիան քրոնիկ մկանաոսկրային ցավն է, որը շատ հաճախ կապված է լինում կոգնիտիվ խանգարումների հետ: Գիտնականներն ընդգծում են, որ այս ախտորոշումով հիվանդները դժվարությամբ են կենտրոնանում, ցրված են լինում և չեն կարողանում երկար զրույցներ վարել:

Տզի խայթոց

Հյուսիսային կիսագնդում տզերի միջոցով մարդուն փոխանցվող ամենատարածված ախտաբանությունը Լայմի հիվանդությունն է: Միջատի խայթոցի հետևանքով արյան մեջ հայտնված բակտերիաներն ախտահարում են գրեթե բոլոր օրգանները, այդ թվում նաև գլխուղեղը: Խնդիրը ժամանակին հայտնաբերելու և ճիշտ միջոցներ ձեռնարկելու դեպքում հիվանդությունից կարելի է ազատվել, սակայն բուժօգնության հետաձգման դեպքում խնդիրը կարող է քրոնիկական բնույթ ստանալ, ինչի հնարավոր հետևանքներից մեկը կդառնալ մտավոր աշխատունակության անկումը:

Նյութի աղբյուրը՝ life.ru