Ինչ է կատարակտը և որոնք են դրա զարգացման պատճառները, ախտանշաններն ու կանխարգելման եղանակները

Կատարակտը համարվում է 50 տարեկանից բարձր անձանց տեսողության կորստի ամենատարածված պատճառը, ուստի այս հիվանդության կանխարգելումն ու վաղ հայտնաբերումը շատ կարևոր է: Այն աչքի ոսպնյակի մթագնումն է, որը կարող է ախտահարել ինչպես մի աչքը, այնպես էլ երկուսը:

Ոսպնյակը գտնվում է աչքի ներսում և օգնում է կենտրոնացնել լույսը ցանցաթաղանթի՝ լուսազգայուն հյուսվածքի վրա: Եթե աչքն առողջ է, ապա լույսն անցնում է ոսպնյակի միջով և հայտնվում ցանցաթաղանթի վրա, որտեղ էլ վերածվում է նյարդային ազդանշանի: Որպեսզի ցանցաթաղանթը հստակ պատկեր ստանա, ոսպնյակը պետք է թափանցիկ լինի, և հենց սա է պատճառը, որ ոսպնյակի մթագնումը հանգեցում է տեսողության վատացման:

Կատարակտի զարգացման պատճառները

Հիվանդության զարգացման պատճառներն առայժմ հստակ հայտնի չեն: Ոսպնյակը հիմնականում բաղկացած է ջրից ու սպիտակուցներից, որոնք ունեն յուրահատուկ կառուցվածք, ինչի շնորհիվ լույսն անցնում է դրա միջով ու հասնում ցանցաթաղանթին: Սակայն ծերացման հետ մեծտեղ այդ սպիտակուցները կարող են ձևավորել խմբավորումներ, ինչի հետևանքով դրանք փոխում են ոսպնյակի մի հատվածը: Ժամանակի ընթացքում այս հատվածի պատճառով լույսը դժվարությամբ է անցնում ոսպնյակի միջով, ինչն էլ հանգեցնում է տեսողության վատացման:

Կատարակտի զարգացմանը նպաստող գործոնները

Հիվանդության զարգացմանը նպաստող հիմնական գործոններն են քրոնիկ հիվանդությունները (օրինակ՝ շաքարային դիաբետն ու զարկերակային գերճնշումը), ինչպես նաև ալկոհոլի ու ծխախոտի չարաշահումը: Բացի այդ, կատարակտի զարգացմանը կարող են նպաստել նաև որոշ դեղամիջոցները, նախկինում աչքերի այլ հիվանդությունների առկայությունը, ուլտրամանուշակագույն ճառագայթների մշտական ազդեցությունը և ժառանգական նախատրամադրվածությունը:

Կատարակտի ախտանշանների շարքին են դասվում.

տեսողության վատացումը թույլ լուսավորության դեպքում,

աղոտ տեսողությունը,

լույսերի շուրջ շջանակների առկայությունը,

լուսազգայունությունը,

գույների ընկալման վատացումը:

Կատարակտի կանխարգելումը

Հետազոտությունները ցույց են տվել, որ վիտամին E-ով, կարոտինոիդներով, լյուտեինով ու զեակսանտինով հարուստ սննդակարգը զգալիորեն նվազեցնում է կատարակտի զարգացման հավանականությունը: Բացի այդ, արդյունավետ կարող է լինել նաև արևապաշտպան ակնոցը, որը կպաշտպանի ուլտրամանուշակագույն ճառագայթներից:

Աչքերի առողջության պահպան համար շատ կարևոր է նաև գերծանրաբեռնվածությունից խուսափելը և վառ էկրանի մոտ երկար չգտնվելը:

Այս հիվանդության բուժումն իրականացվում է հիմնականում վիրահատական ճանապարհով, սակայն վիրահատություն նշանակվում է միայն խորացած դեպքերում, երբ տեսողությունն արդեն զգալի վատանում է: Այնուամենայնիվ փորձը ցույց է տվել, որ վիրահատությունը որպես կանոն բարեհաջող է անցնում:

Նյութի աղբյուրը՝ budetezdorovy.ru