5 տարածված «միֆ» ծերունական թուլամտության մասին, որոնց շատերը դեռ հավատում են

11:36 • 04.05.19

Ծերունական թուլամտությունը կամ դեմենցիան անբուժելի զարգացող հիվանդություն է, որին յուրաքանչյուր տարի միլիոնավոր մարդիկ են բախվում: Սա բավական լուրջ խնդիր է, որի դեմ գիտնականները չեն դադարում պայքարել: Այսօր հիվանդությունն արդեն բավական ուսումնասիրված է և գույությունն ունեն տարբեր դեղամիջոցներ դրա զարգացման գործընթացը դանդաղեցնելու համար, սակայն այնուամենայնիվ կան տարածված «միֆեր», որոնց մարդիկ շարունակում են հավատալ: Ձեզ ենք ներկայացնում դրանցից մի քանիսը:

Հիվանդությունն ախտահարում է միայն տարեցներին

Ծերունական թուլամտությունը մեծ մասամբ հանդիպում է տարեցների մոտ: Հիվանդների ճնշող մեծամասնությունը 65 տարեկանից բարձր մարդիկ են, սակայն մինչ օրս պարզ չէ, թե ինչու է հիվանդության զարգացման հավանականությունն աճում տարիքի հետ: Այնուամենայնիվ գոյություն ունեն դեմենցիայի տեսակներ, որոնք հանդիպում են նաև երիտասարդների մոտ: Խոսքը, մասնավորապես, Ալցհեյմերի հիվանդության մասին է, որը կարող է զարգանալ անգամ 30 տարեկանում:

Ծերունական թուլամտությունը «մահվան դատավճիռ» է

Այս հիվանդությունն անբուժելի է, սակայն հիվանդներից շատերն ախտորոշումից հետո ապրում են 5-20 տարի: Առավել հաճախ հիվանդներն ախտորոշումից հետո ապրում են 8-10 տարի, ինչը բավական երկար է ժամանակահատված է՝ հաշվի առնելով այն փաստը, որ հիվանդությունը հաճախ սկսում է զարգանալ տարեց հասակում:

Սա ժառանգական հիվանդություն է

Մասամբ այս «միֆը» հիմնված է իրականության վրա, քանի որ կարող է լինել որոշակի գենետիկ նախատրամադրվածություն, սակայն հետազոտությունները բազմիցս ապացուցել են, որ ծերունական թուլամտության զարգացման վրա ազդում են կենսակերպն ու այլ հիվանդությունների առկայությունը: Ռիսկային գործոնների թվում են գլխի վնասվածքները, զարկերակային գերճնշումը, շաքարային դիաբետն ու սրտի հիվանդությունները:

Այս հիվանդության դեպքում որևէ հույս չկա

Ալցհեյմերի հիվանդության ու ծերունական թուլամտության այլ տեսակների դեպքում մարդը պետք է սովորի ապրել այդ խնդրով: Բացի այդ, վաղ ախտորոշումն ու որոշ դեղամիջոցներն օգնում են վերահսկողության տակ պահել ախտանշանները: Շատ կարևոր է նաև ընկերների ու հարազատների աջակցությունը, ինչպես նաև մասնագիտացված օգնությունը:

Կանանց ու տղամարդկանց մոտ հիվանդությունը նույն հաճախականությամբ է ախտորոշվում

Գիտնականները մինչ օրս չեն կարողանում բացատրել, թե ինչով է պայմանավորված, որ ծերունական թուլամտությունը երկու անգամ հաճախ ախտորոշվում է կանանց մոտ: Ոմանք կարծում են, որ սա կարող է պայամանավորված լինել նրանով, որ կանայք ավելի երկար են ապրում, իսկ ոմանք էլ նման վիճակագրությունը կապում են դաշտանադադարից հետո կանանց օրգանիզմում էստրոգենի մակարդակի նվազման հետ:

Նյութի աղբյուրը՝ medikforum.ru