Որ ախտանշաններն են հուշում թոքերի քաղցկեղի մասին

Թոքերի քաղցկեղը համարվում է այս հիվանդության ամենավտանգավոր տեսակներից մեկը, քանի որ հաճախ հայտնաբերվում է ուշ փուլերում, երբ հիվանդի կյանքը փրկելու հավանականությունը զգալի նվազած է լինում: Սակայն բրիտանացի գիտնականները ներկայացրել են այս հիվանդության առանցքային ախտանշանները, որոնք կօգնեն ժամանակին ախտորոշել խնդիրն ու կանխել դրա հետագա զարգացումը:

Մասնագետներն ընդգծում են, որ թոքերի քաղցկեղի դեպքում ռիսկային խմբում են ոչ միայն ծխող մարդիկ, ինչպես ընդունված էր ենթադրել նախկինում, այլև բազմաթիվ չծխողներ: Հենց սա է պատճառը, որ շատերը ժամանակին չեն հայտնաբերում հիվանդությունը, ինչը դժվարացնում է դրա բուժումը: Միևնույն ժամանակ հարկ է հիշել, որ հիվանդության բարեհաջող բուժման համար հարկավոր է ժամանակին ուշադրություն դարձնել հիվանդության առաջին ախտանշաններին ու անմիջապես միջոցներ ձեռնարկել:

Թոքերի քաղցկեղի մասին հուշող առանցքային ախտանշանը, մասնագետների խոսքով, հազն է, որը չի անհետանում ավելի քան 2-3 շաբաթ: Բացի այդ, այս հիվանդության մասին են հուշում նաև կրծքավանդակի կայուն վարակները, մշտական հևոցը, քրոնիկ հոգնածությունը, ախորժակի կորուստն ու քաշի անբացատրելի նվազումը, ինչպես նաև հազալիս խորխի մեջ արյան առկայությունը, ցավով ուղեկցվող շնչառությունն ու հազալիս ճնշման զգացողությունը:

Նշված ախտանշանները դասվում են թոքերի քաղցկեղի մասին վկայող բավական ակնհայտ ախտանշանների շարքին, մինչդեռ կան այնպիսինները, որոնք մարդիկ ոչ միշտ են կապում այս հիվանդության հետ: Նման ախտանշանների շարքին են դասվում մատների արտաքին տեսքի փոփոխությունը (օրինակ՝ դրանց ծռվածությունն ու ծայրերի մեծացումը), ինչպես նաև դեմքի ու պարանոցի այտուցները, ուսերում տհաճ զգացողությունների առկայությունն ու ձայնի խռպոտությունը:

«Շատ երկար ժամանակ թոքերի քաղցկեղը համարվում էր ծխելու սովորության հետ կապված հիվանդություն: Սա շարունակում է մնալ շատ կարևոր ասոցացում, սակայն, ինչպես ցույց է տվել փորձը, խնդրի մասշտաբները վկայում են, որ հարկավոր է տեղեկացնել մարդկանց նաև ռիսկային այլ գործոնների մասին: Այս դեպքում մահվան դեպքերի թիվն ավելի մեծ է, քան արգանդի վզիկի քաղցկեղից, լիմֆոմայից ու լեյկոզից մահվան դեպքերի թիվը», - ընդգծում է պրոֆեսոր Փոլ Քոսֆորդը:

Միևնույն ժամանակ գիտնականները հավելում են, որ չծխողների մոտ թոքերի քաղցկեղի զարգացման հիմնական պատճառներն են պասիվ ծխելը, քաղցկեղածին նյութերի ազդեցությունն ու արտաքին միջավայրի աղտոտվածությունը:

Նյութի աղբյուրը՝ med2.ru