Որոնք են խուզող որքինի (стригущий лишай) հիմնական ախտանշաններն ու բուժման ժողովրդական միջոցները

Որքինները շատ տհաճ վարակիչ հիվանդությունների խումբ են, որոնք կարող են փոխանցվել հիվանդի հետ շփման արդյունքում: Առավել հաճախ այս հիվանդությունները փոխանցվում են կենդանիներից, սակայն վարակվել կարելի է ոչ միայն նրանցից:

Որքինները կարող են պայմանավորված լինել սնկերով կամ վիրուսներով, իսկ դրանցից ազատվելը երբեմն բավական բարդ է լինում: Այս հիվանդությունների ախտանշանները բավական նման են լինում, իսկ երբեմն էլ մարդիկ դրանք շփոթում են այլ հիվանդությունների հետ, ուստի հստակ ախտորոշման համար հարկավոր է դիմել մասնագետին: Ամենից ակնհայտ ախտանշաններն են մաշկի թեփոտվածությունը, քորն ու բնորոշ մաշկային բծերը, որոնք կարող են լինել ինչպես բաց գույնի, այնպես էլ մուգ: Ընդ որում, առավել հաճախ ախտաշաններն ի հայտ են գալիս հիվանդի հետ շփումից մոտ 15 օր անց:

Որքինի հարուցիչի ակտիվացման պատճառ կարող են դառնալ սթրեսը, թույլ իմունային համակարգն ու անգամ աղեստամոքսային տրակտի հետ կապված խնդիրները: Հիվանդության որոշ տեսակներ կարող են մարդու մաշկին մնալ տարիներ շարունակ և դրսևորվել օրգանիզմում տեղի ունեցած որևէ խանգարման դեպքում:

Որքինի ամենատարածված տեսակներից մեկն է համարվում տրիխոֆիտիան կամ խուզող որքինը, որին բնորոշ ախտանշաններից է ախտահարման հատվածում մազերի փխրունությունը: Այս հիվանդության դեպքում մաշկը թեփոտվում է, իսկ բծերն ունենում են հստակ եզրագծեր:

Խուզող որքինը սովորաբար ախտահարում է ձեռքերը, ուսերն ու գլխամաշկը, իսկ բուժումը տևում է մինչև 60 օր: Այս հիվանդությունը հատկապես հաճախ է ախտորոշվում երեխաների մոտ, ուստի շատ կարևոր է, որ փոքրիկները սովորեն հետևել իրենց հիգիենային և լվանան ձեռքերը փողոցից տուն գալուց ու կենդանիների հետ շփումից հետո:

Տրիխոֆիտիայի դեպքում բուժումը ժամանակին սկսելը շատ կարևոր է, քանի որ մազերի կորուստը կարող է անդառնալի լինել: Հիվանդության ախտանշանների ի հայտ գալու դեպքում հարկավոր է անհապաղ դիմել մասնագետին ու հետևել նրա բոլոր ցուցումներին, սակայն միևնույն ժամանակ կան նաև մի շարք բնական միջոցներ, որոնք կօգնեն արագացնել բուժման գործընթացը:

Ձեր ուշադրությանն ենք ներկայացնում դրանցից ամենաարդյունավետները.

Կեչու բողբոջների ոգեթուրմ

Այս թուրմը պատրաստելու համար հարկավոր է 30 գրամ բողբոջները թրմել 1 լիտր օղու մեջ, այնուհետև ստացված ոգեթուրմն օգտագործել ախտահարված հատվածներին թրջոցներ դնելու համար:

Խնձորի քացախ ու սխտոր

Այս դեղամիջոցը պատրաստելու համար հարկավոր է սխտորի 4 պճեղին ավելացնել կես լիտր խնձորի քացախ և երկու շաբաթ թրմել որևէ մութ տեղում: Ստացված թուրմն օգտագործել ախտահարված մաշկի մշակման համար:

33%-անոց ծծմբի քսուք

Սա շատ տարածված, արդյունավետ ու վստահելի միջոց է: Այն հատկապես օգտակար է լինում սալիցիլաթթվի և ձյութօճառի հետ կիրառելու դեպքում:

Այս բնական միջոցները շատ արդյունավետ են, սակայն հարկ է հիշել, որ դրանք հարկավոր է օգտագործել միայն բժշկի հետ խորհրդակցելուց հետո, քանի որ միայն մասնագետը կկարողանա հստակ ախտորոշել հիվանդությունն ու նշանակել ճիշտ բուժումը:

Նյութի աղբյուրը՝ budetezdorovy.ru