6 տարածված «միֆ» օնկոլոգիական հիվանդությունների մասին

17:17 • 13.05.19

Օնկոլոգիական հիվանդությունները մարդկության համար մեծագույն չարիքներից մեկն են դարձել, և զարմանալի չէ, որ դրանց մասին պարբերաբար որևէ նոր հոդված է լույս տեսնում: Երբեմն հրապարակված տեղեկությունը պարզապես հիմարություն է թվում, իսկ երբեմն էլ՝ բավական խելամիտ, մինչդեռ քաղցկեղն այն հիվանդությունն է, որի դեպքում պետք չէ կուրորեն հավատալ ցանկացած տեղեկության: Ձեր ուշադրությանն ենք ներկայացնում 6 տարածված «միֆ» քաղցկեղի մասին, որոնց մարդիկ շարունակում են հավատալ:

«Միֆ» 1-ին. գիտնականները պարզել են քաղցկեղի զարգացման պատճառը

Մինչ օրս գիտնականները չեն ուսումնասիրել այս հիվանդության զարգացման պատճառները: Իհարկե որոշ դեպքերում ուռուցքները պայմանավորված են լինում որոշակի գործոններով, սակայն հիվանդության հետ կապված շատ հարցեր, այնուամենայնիվ, դեռ ուսումնասիրված չեն: Բժիշկները պարզապես խորհուրդ են տալիս խուսափել կենցաղային քիմիայի որոշ տարրերից, ծանր մետաղական աղերից ու թունաքիմիկատներից՝ ենթադրելով, որ դրանք քաղցկեղածին ազդեցություն են ունենում:

«Միֆ» 2-րդ. բջջային հեռախոսները վտանգավոր են

Համարվում էր, որ բջջային հեռախոսները խիստ բացասաբար են ազդում գլխուղեղի վրա, սակայն հետազոտությունները ցույց են տվել, որ այս սարքերի արձակած ճառագայթներն այնքան վտանգավոր չեն, որքան ընդունված է համարել:

«Միֆ» 3-րդ. բերանի խոռոչի ողողման միջոցները քաղցկեղ են առաջացնում

Նախկինում փորձագետները ենթադրում էին, որ բերանի խոռոչի ողողման միջոցները, որոնք էթանոլ են պարունակում կարող են դառնալ բերանի խոռոչի քաղցկեղի պատճառ, քանի որ ավելի խոցելի են դարձնում այդ հատվածի հյուսվածքները քաղցկեղածին տարրերի նկատմամբ, սակայն ատամնաբույժներն այս հեղուկների գործածության ու քաղցկեղի զարգացման միջև որևէ կապ, այնուամենայնիվ, չեն հայտնաբերել:

«Միֆ» 4-րդ. միզապարկի քաղցկեղը զարգանում է արհեստական քաղցրացուցիչների պատճառով

Նախկինում մկների վրա անցկացված ուսումնասիրությունը ցույց է տվել, որ տարածված ցիկլամատ արհեստական քաղցրացուցիչը կրծողների մոտ միզապարկի քաղցկեղ է առաջացնում, ինչի արդյունքում այս տարրի գործածությունը բազմաթիվ երկրներում արգելվել է: Սակայն ավելի ուշ այն կրկին սկսել են կիրառել, քանի որ մասնագետները չեն հայտնաբերել մարդկանց առողջության վրա դրա որևէ բացասական ազդեցություն: Մասնավորապես ապացուցվել է, որ այն չի ազդում քաղցկեղի զարգացման վրա:

«Միֆ» 5-րդ. կրծկալը հանգեցնում է կրծքագեղձի քաղցկեղի

Ժամանակին ամերիկացի բժիշկ մարդաբանները հայտարարել են, որ կրծկալը նպաստում է կանանց կրծում տոքսինների կուտակման, ինչն էլ հանգեցնում է կրծքագեղձի քաղցկեղի, սակայն գիտնականները պնդում են, որ սա պարզապես ենթադրություն է, քանի որ կրծկալի և կրծքագեղձի քաղցկեղի միջև որևէ կապ չի հայտնաբերվել: Նրանց խոսքով՝ քաղցկեղի այս տեսակի զարգացման հավանականության վրա ազդում են այլ գործոններ, այդ թվում՝ ժառանգական նախատրամադրվածությունը, քաշն ու տարիքը:

«Միֆ» 6-րդ. ստատինները բարձրացնում են քաղցկեղի զարգացման հավանականությունը

Ստատինները դեղամիջոցներ են, որոնք օգնում են նվազեցնել արյան մեջ խոլեստերինի մակարդակը, սակայն կա տարածված կարծիք, որ դրանք բարձրացնում են քաղցկեղի զարգացման հավանականությունը: Նման կարծիք է ձևավորվել 2007 թվականին անցկացված հետազոտությունից հետո, որը ցույց է տվել, որ ստատինները քաղցկեղածին դեղամիջոցներ են, սակայն տարիներ հետո մեկ այլ հետազոտության արդյունքում պարզվել է, որ իրականում այս հիվանդության զարգացման հավանականության վրա ազդում են ոչ թե ստատինները, այլ խոլեստերինի բարձր մակարդակը:

Նյութի աղբյուրը՝ medikforum.ru