Հորմոնալ դիսբալանսի մասին վկայող ախտանշաններ, որոնք կանայք հաճախ են անտեսում

Հորմոնները մասնակցում են օրգանիզմում տեղի ունեցող բոլոր գործընթացներին, սակայն հորմոնալ դիսբալանսի ախտանշանները ոչ միշտ են ակնհայտ լինում: Լուրջ խանգարումների բացակայության դեպքում կանայք ուշադրություն չեն դարձնում այս խնդրին, ինչի հետևանքով այն էլ ավելի է խորանում՝ ի վերջո հանգեցնելով լուրջ խանգարումների:

Նման տհաճ հետևանքներից խուսափելու համար ձեր ուշադրությանն ենք ներկայացնում 9 ախտանշան, որոնք կհուշեն հորմոնալ ֆոնի խանգարումների մասին և կօգնեն ժամանակին միջոցներ ձեռնարկել:

Քաշի անբացատրելի տատանումներ

Հորմոնալ դիսբալանսի մասին հուշող ախտանշան կարող է լինել սննդակարգով չպայմանավորված ավելորդ քաշը: Նման դեպքերում հարկավոր է անպայման դիմել բժշկին և անալիզ հանձնել խնդրի պատճառը պարզելու համար:

Քաշի ավելացման պատճառ կարող է դառնալ նաև վահանագեղձի աշխատանքի խանգարումը, ինչը պայմանավորված է նրանով, որ այս օրգանը կարգավորում է նաև նյութափոխանակության գործընթացները: Բացի այդ, ավելորդ քաշի պատճառ կարող է դառնալ նաև սթրեսի հորմոնը՝ կորտիզոլը, որը հանգեցնում է որովայնի հատվածում տոքսիկ ճարպի մակարդակի ավելացման:

Թուլություն ու մշտական հոգնածություն

Նորմալ քնի ու հանգստի դեպքում տանջող հոգնածությունը նույնպես վկայում է հորմոնալ դիսբալանսի մասին: Սա պայմանավորված է կորտիզոլի մակարդակով, որն արտադրվում է մակերիկամներում սթրեսի ժամանակ: Բացի այդ, սա կարող է պայմանավորված լինել նաև վահանագեղձի հորմոնների դեֆիցիտով, ինչն առավել հաճախ նկատվում է նախադաշտանադադարի ու դաշտանադադարի ժամանակ:

Վատ տրամադրություն

Վահանաձև գեղձի հորմոնների ցածր մակարդակը կարող է հանգեցնել նաև տրամադրության հետ կապված այնպիսի խնդիրների, ինչպիսին են անհանգստությունը, դեպրեսիան, դյուրագրգիռությունն ու տխրությունը: Բացի այդ, սա կարող է պայմանավորված լինել նար սերոտոնինի ու էնդորֆինի ցածր մակարդակով, իսկ այս հորմոնները պատասխանատու են բարձր տրամադրության համար: Եթե տրամադրության տատանումներն սկսում են ավելի հաճախակի բնույթ կրել, ի հայտ է գալիս անբացատրելի անհագստություն ու տագնապ, ապա հարկավոր է խորհրդակցել բժշկի հետ:

Առատ քրտնարտադրություն

Հորմոնալ դիսբալանսի մասին հուշող ևս մի ախտանշան կարող է լինել մարմնի ջերմաստիճանի փոփոխությունը, որն ուղեկցվում է առատ քրտնարտադրությամբ (հատկապես գիշերվա ընթացքում), ջերմահորդանքներով, սրտխփոցով ու ծակծկոցով: Սա պայմանավորված է լինում էստրոգենի մակարդակի փոփոխությամբ ու վկայում է դաշտանադադարի մասին:

Բացի այդ, առատ քրտնարտադրությունը կարող է պայմանավորված լինել նաև այնպիսի հորմոնների ցածր մակարդակով, ինչպիսին է սերոտոնինը, ուստի նման ախտանշանի դեպքում անհրաժեշտ է խորհրդակցել մասնագետի հետ:

Անքնություն ու անհանգիստ քուն

Էստրոգենը պատասխանատու է նաև քնի ռեժիմի կարգավորման համար, ուստի այս հորմոնի մակարդակի նվազումը կարող է դառնալ քնի խանգարումների պատճառ: Առավել հաճախ այս խնդիրը հանդիպում է դաշտանադադարի ժամանակ, սակայն հարկավոր է հաշվի առնել, որ քնի խանգարումն իր հերթին կարող է ազդել այլ հորմոնների վրա և առողջական խնդիրների զարգացման պատճառ դառնալ:

Միգրեն ու հիշողության վատացում

Հորմոնալ խանգարման ամենատարածված ախտանշանների շարքին են դասվում նաև միգրենն ու հիշողության վատացումը:

Մարսողական խնդիրներ

Սեկրետին, գաստրին ու խոլեցիստոկինին հորմոնները մասնակցում են մարսողության ու սննդի տարրալուծման գործընթացին, ուստի աղիներում դրանց դիսբալանսը կարող է դառնալ մարսողական խնդիրների զարգացման պատճառ:

Քաղցր ուտելու ցանկություն

Քաղցր մթերք ուտելու անկառավարելի ցանկությունը նույնպես վկայում է վահանաձև գեղձի աշխատանքի խանգարման մասին, ուստի հարկավոր է շատ ուշադիր լինել:

Մազաթափություն

Մազաթափության հիմնական պատճառներից մեկը տեստոստերոնի ցածր մակարդակն է, սակայն շատերն այս խնդիրը վերագրում են գենետիկ նախատրամադրվածությանը: Նման դեպքերում հարկավոր է անհապաղ բուժզննում անցնել:

Նյութի աղբյուրը՝ budetezdorovy.ru