4 արդյունավետ ժողովրդական միջոց միզուղիների վարակների բուժման համար

Միզուղիների վարակներն ամենատարածված հիվանդություններից են: Ընդ որում, դրանք հատկապես տարածված են կանանց շրջանում: Այս հիվանդությունների դեպքում հարկավոր է անպայման դիմել մասնագետին ու հետևել նրա բոլոր ցուցումներին, սակայն կան բնական միջոցներ, որոնք հիմնական բուժման հետ համադրելը կօգնի արագացնել բուժման գործընթացն ու բարելավել ինքնազգացողությունը:

Այս բնական միջոցներում կիրառվում են միզամուղ ազդեցությամբ ու բազմաթիվ բուժիչ հատկություններով օժտված դեղաբույսեր, որոնք թույլ են տալիս շատ կարճ ժամանակահատվածում հասնել հիանալի արդյունքի: Ձեր ուշադրությանն ենք ներկայացնում դրանցից մի քանիսը:

Դեղաբույսերով թեյ

Օգտակար բույսերով պատրաստված այս թեյը հարկավոր է խմել գոլ վիճակում օրական մոտ 3 անգամ:

Անհրաժեշտ բաղադրիչներն են.

1 թեյի գդալ կանաչ թեյ,

½ թեյի գդալ դաշտային ձիաձետ,

1 թեյի գդալ խատուտիկի արմատ կամ ծաղիկներ,

1 լիտր ջուր:

Պատրաստման եղանակը.

Ջուրը եռացնել ու ավելացնել բույսերը: Ծածկել կաթսան կափարիչով և թողնել թրմվի մինչև սառչի: Պատրաստի թուրմը քամել ու խմել օրվա ընթացքում:

Մաղադանոսով թեյ

Մաղադանոսն օժտված է միզամուղ հատկություններով, ինչի շնորհիվ հիանալի միջոց է օրգանիզմի դետոքսիկացիայի ու ավելորդ հեղուկի դուրսբերման համար: Բացի այդ, այն մաքրում է միզազատական համակարգն ու դուրս է բերում բոլոր վնասակար տարրերը:

Սակայն հարկ է հիշել, որ օրգանիզմի սխալ հիդրատացիան նպաստում է միզուղիների վարակների ակտիվացմանն, իսկ միզամուղ միջոցներն այս դեպքում էլ ավելի են վատացնում վիճակը: Լուրջ խնդիրներից խուսափելու համար մաղադանոսով թեյի կիրառման դեպքում հարկավոր է օրական առնվազն 2.5 լիտր ջուր խմել:

Անհրաժեշտ բաղադրիչներն են.

1 ճաշի գդալ մանրացրած թարմ մաղադանոս,

1 լիտր ջուր:

Պատրաստման եղանակը.

Մաղադանոսը լցնել կաթսայի մեջ, ավելացնել եռման ջուր ու թրմել 20-25 րոպե: Քամել թեյն ու խմել օրվա ընթացքում (առանց շաքարավազի):

Ոսկեշիվի (золотарник) թուրմ

Այս թուրմ հատկապես օգտակար է, երբ վարակն ուղեկցվում է ուժգին ցավով: Ոսկեշիվը միզամուղ բույս է, որն օժտված է նաև հակաբորբոքային ու հանգստացնող հատկություններով, որոնք օգնում են վերահսկողության տակ պահել ցավը:

Անհրաժեշտ բաղադրիչներն են.

15 գրամ ոսկեշիվ,

750 մլ ջուր:

Պատրաստման եղանակը.

Բույսը լցնել կերամիկական կամ ապակյա տարայի մեջ, ավելացնել տաք ջուր, ծածկել կափարիչով ու թրմել 10 րոպե: Քամել թուրմն ու խմել օրական առնվազն երեք անգամ բուժման առաջին երեք օրվա ընթացքում: Այն կօգնի մեղմել միզապարկի ցավն ու այրոցը միզելու ընթացքում:

Լոռամիրգ

Այս հատապտուղը միզուղիների վարակներից ազատվելու լավագույն միջոցներից մեկն է: Այն պարունակում է դաբաղանյութեր, որոնք թույլ չեն տալիս, որ բակտերիաները կպչեն միզազատական համակարգի պատերին: Բացի այդ, այն անվնաս է հղիների ու կերակրող մայրերի համար: Կարելի է պարզապես օրական երկու անգամ մի բուռ լոռամիրգ ուտել:

Նշված բնական միջոցները շատ արդյունավետ են, սակայն հարկ է հիշել, որ դրանք չեն կարող օգտագործվել դեղորայքի փոխարեն: Բացի այդ, վերոնշյալ միջոցներից որևէ մեկը կիրառելուց առաջ հղիներին ու կերակրող մայրերին խորհուրդ է տրվում անպայման խորհրդակցել բժշկի հետ:

Նյութի աղբյուրը՝ budetezdorovy.ru