Վեց հիվանդություն, որոնք կարող են զարգանալ առանց որևէ ախտանշանի

Ցանկացած հիվանդության արդյունավետ բուժման համար հարկավոր է առաջին հերթին ժամանակին ախտորոշել խնդիրը, ինչը գրեթե անհնարին կլինի առանց դրա ախտանշաններն իմանալու, սակայն կան հիվանդություններ, որոնք զարգանում են առանց որևէ ախտանշանի, ուստի մարդիկ երկար ժամանակ գլխի չեն ընկնում դրանց առկայության մասին: Մասնագետները ներկայացրել են այն հիվանդությունները, որոնք երկար ժամանակ որևէ կերպ չեն դրսևորվում և հայտնաբերվում են բավական ուշ, ինչի հետևանքով բուժումը ոչ միշտ է արդյունավետ լինում:

Մասնագետների ներկայացրած ցանկում առաջին հորիզոնականում է հայտնվել զարկերակային գերճնշումը: Վիճակագրական տվյալներով՝ զարկերակային գերճնշումով հիվանդ մարդկանց կեսը գլխի չի ընկնում հիվանդության առկայության մասին: Նրանք չեն նկատում ճնշման անոմալ ցուցանիշներն այնքան ժամանակ մինչև չեն բախվում երիկամների խնդիրներին կամ սրտամկանի կաթվածին:

Առանց ախտանշանների զարգացող մյուս վտանգավոր հիվանդությունը քնի օբստրուկտիվ ապնոէն է, որը բնորոշվում է թոքերի օդափոխման գործընթացի՝ ավելի քան 10 վայրկյան տևողությամբ դադարներով: Այս հիվանդությունն առավել հաճախ ախտորոշվում է կանանց մոտ, իսկ դրա մասին վկայող հիմնական ախտանշաններն են առավոտյան գլխացավերը, գլխապտույտն ու տրամադրության տատանումները: Բացի այդ, այս խնդրի մասին կարող են վկայել նաև անքնությունն ու անհանգիստ քունը, ինչը պայմանավորված է լինում շնչառության խանգարումներով:

Երրորդ հորիզոնականում է գլաուկոման, որը զարգանում է ներակնային բարձր ճնշման հետևանքով: Հիվանդությունը զարգանում է աննշան և դրսևորվում է տեսողության աղոտությամբ ու տեսադաշտի նեղացմամբ: Այս դեպքում հարկավոր է անհապաղ միջոցներ ձեռնարկել, քանի որ հիվանդությունը կարող է դառնալ տեսողության կորստի պատճառ:

Առանց ախտանշանների զարգացող հիվանդությունների շարքին է դասվում նաև շաքարային դիաբետը, որը սկզբնական շրջանում որևէ կերպ չի դրսևորվում, որից հետո ի հայտ են գալիս ոչ շատ ակնհայտ ախտանշաններ՝ բերանի խոռոչի չորություն, հաճախամիզություն, մշտական ծարավի զգացում ու տեսողության վատացում: Բացի այդ, շաքարային դիաբետի մասին կարող է վկայել նաև թևատակերի ու պարանոցի մաշկի կտրուկ մգացումը, ուստի հարկավոր է ուշադիր լինել:

Հինգերորդ հիվանդությունը, որը նշում են մասնագետները, ձվարանների պոլիկիստոզ համախտանիշն է, որի դեպքում կանանց օրգանիզմում բարձրանում է տղամարդկանց բնորոշ հորմոնների մակարդակը: Այս հիվանդությունը կարող է որևէ կերպ չդրսևորվել, սակայն այն շատ վտանգավոր է, քանի որ բարձրացնում է երկրորդ տիպի շաքարային դիաբետի, քնի օբստրուկտիվ ապնոէի, սրտի հիվանդությունների և էնդոմետրիումի քաղցկեղի զարգացման հավանականությունը:

Առանց որևէ նախանշանի զարգացող հիվանդությունների ցանկը եզրափակում է թողերի քաղցկեղը, որն այս հիվանդության ամենատարածված ու վտանգավոր տեսակներից մեկն է: Օնկոլոգիական այս հիվանդությունը զարգանում է առանց ախտանշանի և կարող է ախտահարել անգամ չծխող մարդկանց թոքերը:

Նյութի աղբյուրը՝ actualnews.org