Սրոհունդով ժողովրդական բաղադրատոմսեր հոդացավերից ազատվելու համար

16:23 • 22.05.19

Հոդացավերը կարող են պարզապես անտանելի լինել և բացասաբար անդրադառնալ հիվանդի կյանքի որակի վրա: Նման դեպքերում ցավից ազատվելու համար նշանակվում են հատուկ դեղամիջոցներ, որոնք, սակայն, հաճախ տարբեր կողմնակի բարդություններ են առաջացնում:

Այնուամենայնիվ կան բավական արդյունավետ բնական միջոցներ, որոնք օգնում են մեղմել ցավն ու նվազեցնել բորբոքման մակարդակը: Ընդ որում, այդ բնական միջոցներն իրենց արդյունավետությամբ չեն զիջում դեղամիջոցներին, սակայն միևնույն ժամանակ շատ ավելի անվնաս են և չեն առաջացնում կողմնակի բարդություններ:

Հոդացավերի դեմ պայքարի ամենաարդյունավետ բնական միջոցներից մեկը սրոհունդն է (зверобой), որն օժտված է բազմաթիվ բուժիչ հատկություններով: Այն օգնում է բուժել արթրիտներն ու ազատվել հոդացավերից: Այս յուրահատուկ բույսն օժտված է հակաբորբոքային, ցավազրկող, սպազմոլիտիկ ու հակասեպտիկ հատկություններով, ինչպես նաև խթանում է հյուսվածքների վերականգնումն ու թարմացումը:

Սակայն այս բույսը կիրառելիս հարկավոր է հաշվի առնել, որ այն նպաստում է զարկերակային ճնշման բարձրացմանը, ուստի զարկերակային գերճնշումով տառապող հիվանդներին խորհուրդ է տրվում ընդունել սրոհունդը միայն այլ բույսերի հետ համադրած:

Այսպիսով ձեր ուշադրությանն ենք ներկայացնում սրոհունդով երկու բնական միջոց, որոնք կօգնեն մեղմել հոդացավերն ու վերականգնել հոդերի բնականոն աշխատանքը:

1 ճաշի գդալ չորացրած ու մանրացրած սրոհունդն ավելացնել կես բաժակ եռման ջրին, թրմել, այնուհետև ստացված թուրմից 1/3 բաժակ խմել ուտելուց 20-40 րոպե առաջ: Այն կօգնի մեղմել ցավն ու նվազեցնել հոդերի բորբոքման մակարդակը:

Սրոհունդը շատ օգտակար է նաև կոմպրեսների տեսքով օգտագործելու դեպքում: Հարկավոր է 2-3 ճաշի գդալ սրոհունդը թրմել 2 բաժակ եռման ջրում, թողնել մի փոքր սառչի, այնուհետև թուրմն օգտագործել հիվանդ հոդին կոմպրեսի տեսքով դնելու համար:

Նյութի աղբյուրը՝ aif.ru