Ախտանշաններ, որոնք վկայում են վահանաձև գեղձի աշխատանքի խանգարման մասին

Վահանաձև գեղձը պարանոցի առջևի հատվածում գտնվող ոչ մեծ օրգան է, որը մասնակցում է օրգանիզմում տեղի ունեցող ամենատարբեր գործընթացներին: Սա է պատճառը, որ այս օրգանի աշխատանքի ցանկացած խանգարում բացասաբար է անդրադառնում ամբողջ օրգանիզմի վրա:

Վահանագեղձի դիսֆունկցիայի դեպքում օրգանը կարող է բավարար քանակությամբ հորմոն չարտադրել կամ արտադրել դրանք չափազանց շատ: Նման խանգարումները կարող են պայմանավորված լինել տարբեր պատճառներով, այդ թվում՝ հղիությամբ, որոշ դեղամիջոցների ընդունմամբ, իմունային համակարգի թուլացմամբ, յոդի դեֆիցիտով, վիրուսային վարակներով և այլն:

Լուրջ հետևանքներից խուսափելու համար հարկավոր է ժամանակին հայտնաբերել վահանաձև գեղձի հետ կապված խնդիրները, ուստի ձեր ուշադրությանն ենք ներկայացնում 6 ախտանշան, որոնք հուշում են գեղձի աշխատանքի խանգարման մասին:

Քաշի անբացատրելի ավելացում կամ նվազում

Եթե վահանագեղձը չափազանց շատ հորմոն է արտադրում, մարդը կարող է կտրուկ նիհարել անգամ շատ ուտելու դեպքում, մինչդեռ հորմոնների մակարդակի նվազումը նպաստում է ավելորդ քաշի ավելացմանը: Ընդ որում, այս խանգարումների ֆոնին հաճախ դիետաներն ու ֆիզիկական ակտիվությունն անարդյունավետ են լինում:

Ցրտի կամ շոգի զգացողություն

Շրջակա միջավայրի ջերմաստիճանի նկատմամբ օրգանիզմի ռեակցիայի կտրուկ փոփոխությունը, որը պահպանվում է երկար ժամանակ, նույնպես կարող է հուշել վահանագեղձի գործառույթների խանգարման մասին: Եթե մարդը մշտապես մրսում է կամ շոգում, ապա պետք է անպայման բուժզննում անցնի:

Մաշկի վիճակի վատթարացում

Մաշկի վիճակի փոփոխությունները կարող են պայմանավորված լինել տարբեր խանգարումներով: Վահանագեղձի հետ կապված խնդիրների դեպքում մաշկն ավելի զգայուն է դառնում, ինչը կարող է դրսևորվել ցանով, գրգռումներով, հաճախակի բորբոքումներով և այլն: Բացի այդ, այն կարող է չորանալ, իսկ որոշ հատվածներում նաև թեփոտվել:

Տրամադրության վատացում

Մարդու տրամադրությունն ուղղակիորեն կախված է հորմոնների մակարդակից, քանի որ դրանք նյարդային համակարգը կարգավորող գլխավոր տարրերն են: Բժիշկների խոսքով՝ շատերը փորձում են անտեսել այս խնդիրն ու ապրել բնականոն կյանքով, մինչդեռ նման մոտեցումը կարող է հանգեցնել հոգեկան խանգարումների: Անտարբերության, տագնապի զգացողության, հուզական լարվածության, անհանգստության, ագրեսիվության և հուզականության դեպքում հարկավոր է անպայման դիմել մասնագետին:

Աղիների աշխատանքի հետ կապված խնդիրներ

Վահանաձև գեղձի հորմոնները կարգավորում են նաև մարսողական համակարգի աշխատանքը, ուստի օրգանի աշխատանքի խանգարման դեպքում կարող են նկատվել ցավոտ զգացողություններ, փորկապություն կամ փորլուծություն:

Սրտի ռիթմի խանգարումներ

Վահանագեղձի աշխատանքի խանգարմանը բնորոշ ախտանշաններից է նաև սրտի ռիթմի խանգարումը: Եթե անգամ չնչին ֆիզիկական ակտիվությունը հանգեցնում է անոթազարկի արագացման, զարկերակային ճնշման տատանումների ու հևոցի, ապա հարկավոր է անհապաղ խորհրդակցել բժշկի հետ:

Նյութի աղբյուրը՝ medikforum.ru