Տարբեր հիվանդությունների զարգացման հավանականությունը՝ ըստ արյան խմբերի

Սեփական արյան խումբն իմանալը շատ կարևոր է, իսկ որոշ դեպքերում անգամ կենսական նշանակություն ունի: Արյան խումբն անմիջականորեն ազդում է ամբողջ օրգանիզմի և առողջության վրա, ուստի դրանից կարող է կախված լինել այս կամ այն հիվանդության զարգացման հավանականությունը:

Արյան խմբերը դասակարգվում են AB0 համակարգով, որի համաձայն կա չորս խումբ՝ առաջին (0), երկրորդ (A), երրորդ (B) և չորրորդ (AB): Արյան առաջին խումբն ամենատարածվածն է, մինչդեռ չորրորդ խմբի արյուն ունի մոլորակի բնակչության միայն 4 տոկոսը: Բացի այդ, գոյություն ունի նաև ռեզուս գործոն (Rh), որը կարող է լինել դրական կամ բացասական:

Այսպիսով՝ ձեր ուշադրությանն ենք ներկայացնում տարբեր վտանգավոր հիվանդությունների զարգացման հավանականությունը՝ ըստ արյան խմբերի:

Դեմենցիա (թուլամտություն)

Տարիքային դեմենցիան առավել հաճախ ախտորոշվում է IV խմբի արյուն ունեցողների մոտ: Հետազոտությունները ցույց են տվել, որ արյան այս խմբով մարդկանց 82 տոկոսի մոտ դեմենցիայի զարգացման հավանականությունը բավական բարձր է, ինչը պայմանավորված է նրանով, որ այդ մարդկանց օրգանիզմում սովորաբար բաձր է լինում արյան մակարդման ու դեմենցիայի զարգացման վրա ազդող սպիտակուցի մակարդակը:

Սրտանոթային հիվանդություններ

Փենսիլվանիայի համալսարանի գիտնականները պարզել են, որ առաջին խմբի արյուն ունեցողների մոտ շատ ավելի հազվադեպ են տեղի ունենում սրտի նոպաներ: Adamts7 գենն ունեցող մարդկանց մոտ սրտի նոպայի հավանականությունը բավական բարձր է, սակայն առաջին խմբի արյուն ունեցողների մոտ նման ռիսկային գործոն չի գրանցվել: Մասնագետների խոսքով՝ առաջին խմբի արյուն ունեցողների շրջանում փոքր է մալարիայից մահացողների թիվը, սակայն միևնույն ժամանակ այս մարդիկ ավելի խոցելի են խոլերայի և ստամոքսի խոցի նկատմամբ:

Գլխուղեղի կաթված

Ամենից հազվադեպ այս հիվանդությունն ախտորոշվում է առաջին խմբի արյուն ունեցողների մոտ: Նրանց մոտ հիվանդության զարգացման հավանականությունը կազմում է 9 տոկոս: Ընդ որում, նման օրինաչափությունն առայժմ որևէ կերպ չի բացատրվում:

Թրոմբներ

II, III և IV խմբերի արյուն ունեցողների մոտ գլխուղեղում թրոմբների զարգացման հավանականությունը 40 տոկոսով ավելի բարձր է քան I խմբի արյուն ունեցողների մոտ: Արյան չորրորդ խումբը բարձրացնում է թրոմբոզի հավանականությունը 20 տոկոսով, ավելորդ քաշը՝ 16, իսկ ծխելը՝ 6 տոկոսով:

Օնկոլոգիական հիվանդություններ

Շվեդ գիտնականները եկել են այն եզրահանգման, որ երկրորդ խմբի արյունը բարձրացնում է ստամոքսի քաղցկեղի զարգացման հավանականությունը 20 տոկոսով: Բացի այդ, առաջին խմբի արյուն ունեցողներն ավելի խոցելի են գաստրիտ ու ստամոքսի խոց առաջացնող Helicobacter pylori բակտերիաների ու  աղեստամոքսային հիվանդությունների ոչ վիրուսային համաճարակներ առաջացնող նորովիրուսների նկատմամբ, իսկ առաջին ու երկրորդ խմբերի արյուն ունեցողները՝ ենթաստամոքսային գեղձի և ձվարանների քաղցկեղի:

Նյութի աղբյուրը՝ med2.ru