Վտանգավոր հիվանդությունների մասին հուշող 7 ախտանշան, որոնք մարդիկ հաճախ են անտեսում

11:40 • 27.05.19

Օրգանիզմում ցանկացած խանգարման դեպքում մարդը միշտ հուշող ազդանշաններ է ստանում տարատեսակ ախտանշանների տեսքով, սակայն խնդիրն այն է, որ ոչ բոլորն են այդ ախտանշաններին պատշաճ ուշադրություն դարձնում: Մայո կլինիկայի մասնագետները ներկայացրել են այն ախտանշանները, որոնց առկայության դեպքում հարկավոր է անպայման բուժզննում անցնել:

Հևոց

Շնչառական խնդիրներն ու սուլոցով ուղեկցվող շնչառությունը, որոնք ի հայտ են գալիս անգամ պարզապես քայլելիս, կարող են վկայել ասթմայի, թոքաբորբի, թոքերի քրոնիկ օբստրուկտիվ հիվանդության, ինչպես նաև թոքերում թրոմբի առկայության մասին:

Քաշի անբացատրելի նվազում

Մասնագետների խոսքով՝ մեկ ամսում մարմնի զարգվածի 5 տոկոսի կամ կես տարում 10 տոկոսի կորուստը լուրջ պատճառ է բժշկին դիմելու համար: Նման ախտանշանը կարող է հուշել քաղցկեղի, շաքարային դիաբետի կամ լյարդի հիվանդությունների զարգացման մասին:

Աղիների աշխատանքի փոփոխություններ

Հաճախակի փորլուծությունները կամ փորկապությունները, ինչպես նաև կղանքի գույնի կտրուկ փոփոխությունը նույնպես շատ վտանգավոր կարող են լինել, ուստի նման դեպքերում հարկավոր է անպայման դիմել մասնագետին: Սա կարող է վկայել աղիներում բորբոքային գործընթացների առկայության կամ հաստ աղիքի քաղցկեղի մասին:

Հագեցածության զգացում անգամ քիչ ուտելու դեպքում

Բժիշկների խոսքով՝ եթե այս ախտանշանը պահպանվում է մեկ շաբաթից ավելի, ապա հարկավոր է անպայման բուժզննում անցնել: Բանն այն է, որ այն կարող է վկայել ենթաստամոքսային գեղձի կամ ձվարանների քաղցկեղի մասին, ուստի անուշադրության մատնելը կարող է շատ վտանգավոր լինել:

Լուսարձակումներ աչքերի առաջ

Այս ախտանշանը պայմանավորված է լինում ցանցաթաղանթի շերտազատման՝ կուրության հանգեցնող վտանգավոր ախտաբանության առկայությամբ: Սովորաբար նման լուսարձակումները լինում են միայն մեկ աչքում, սակայն հազվադեպ կարող են լինել միանգամից երկուսում:

Սուբֆեբրիլ ջերմություն (մինչև 38 °C)

37.7-37.8 °C ջերմությունը, որը չի նվազում ավելի քան երկու շաբաթ, կարող է կապված լինել տուբերկուլոզի կամ չարորակ ուռուցքի հետ:

Հաճախակի գլխացավեր

Գլխացավերի ամենավտանգավոր տեսակը սաստիկ ուժեղ գլխացավն է, որն ուղեկցվում է տենդով, թուլությամբ, ջղաձգումներով, թմրածությամբ ու խոսքի հետ կապված խնդիրներով: 50 տարեկանից բարձր անձանց բժիշկները խորհուրդ են տալիս անպայման դիմել մասնագետին:

Նյութի աղբյուրը՝ medikforum.ru