Ինչպես պաշտպանել երեխային լեյկեմիայից. 8 պարզ քայլ

17:27 • 28.05.19

Լեյկեմիան արյան բջիջների քաղցկեղն է, որը յուրաքանչյուր տարի ախտորոշվում է մոտ 3000 երեխայի մոտ: Ներկա պահին գոյություն չունի որևէ պրոֆիլակտիկ միջոց, որը կազատի այս վտանգավոր հիվանդության զարգացման վտանգից, սակայն կան քայլեր, որոնք կարելի է ձեռնարկել երեխաներին որոշ չափով լեյկեմիայից պաշտպանելու համար: Ձեր ուշադրությանն ենք ներկայացնում դրանցից ամենակարևորները:

Խուսափել ճառագայթումից

Երեխաներին հարկավոր է հնարավորինս պաշտպանել ճառագայթումից, քանի որ առավել հաճախ հենց այս գործոնն է բարձրացնում լեյկեմիայի զարգացման հավանականությունը: Ճառագայթման անգամ ոչ մեծ չափաբաժինը կարող է զգալիորեն բարձրացնել հիվանդության զարգացման հավանականությունը: Ընդ որում, սա վերաբերում է անգամ ռենտգենային ճառագայթներին, համակարգչային շերտագրությանն ու ճառագայթային թերապիային, ուստի հարկավոր է մեծ պատասխանատվությամբ մոտենալ ախտորոշման ու բուժման մեթոդի ընտրությանը:

Խուսափել բենզոլի ազդեցությունից

Բենզոլը տարբեր քիմիական նյութերի հումքն է, որից ստանում են այնպիսի նյութեր, ինչպիսին է բենզինը, պեստիցիդները և այլն: Քաղցր հոտով այս տարրը հեշտությամբ հայտնվում է օրգանիզմում շնչառության ու մաշկի միջոցով: Վիճակագրական տվյալներով՝ բենզոլի ազդեցությանը ենթարկված մարդկանց շրջանում լեյկեմիայով հիվանդների թիվը բավական մեծ է:

Հրաժարվել ծխախոտից

Երեխային պետք է անպայման պաշտպանել ծխախոտի վնասակար ազդեցությունից: Ընդ որում, սա վերաբերում է ոչ միայն նրա կողմից ծխախոտի գործածությանը, այլև նրա մոտ ծխելուն: Ծխախոտի ծուխը պարունակում է վերոնշյալ բենզոլն ու ռադիոակտիվ տարրեր, իսկ պասիվ ծխելն էլ ավելի է ուժեղացնում դրանց ազդեցությունը: Սա է պատճառը, որ ոչ մի դեպքում չի կարելի ծխել տանը, շքամուտքում և այն հասարակական վայրերում, որտեղ երեխաներ են լինում:

Պաշտպանել երեխային քիմիաթերապիայից

Հարկավոր է խուսափել վտանգներից, որոնք կապված են քիմիաթերապիայի որոշակի տեսակների հետ: Նման բուժում անցնող երեխաների մոտ մեծ է երկրորդային քաղցկեղի զարգացման հավանականությունը, որը կարող է ի հայտ գալ բուժման առաջին 5-10 տարվա ընթացքում:

Հրաժարվել ալկոհոլից

Հղիության ընթացքում ալկոհոլից հրաժարվելն օգնում է պաշտպանել ապագա երեխային լեկեմիայից: Բազմաթիվ հետազոտությունները ցույց են տվել, որ հղիության ընթացքում ալկոհոլի գործածությունը կարող է շատ լուրջ հետևանքներ ունենալ:

Առողջ սննդակարգ

Ճիշտ սննդակարգը շատ կարևոր է երեխաների առողջության պահպանման համար, քանի որ առողջարար մթերքն օգնում է ամրապնդել երեխաների օրգանիզմն ու նվազեցնել լեյկեմիայի զարգացման հավանականությունը: Երեխայի սննդակարգը պետք է հարուստ լինի մեծ քանակությամբ բանջարեղենով, մրգերով, անյուղ մսով ու ձկնատեսակներով:

Ֆիզիկական ակտիվություն

Երեխաներին պետք է սովորեցնել ակտիվ կենսակերպ վարել: Ֆիզիկական վարժությունները ոչ միայն նպաստում են լավ մարզավիճակի պահպանմանը, այլև ամրապնդում են իմունային համակարգը: Երեխան պետք է օրական առնվազն մեկ ժամ տրամադրի մարզումներին կամ ակտիվ խաղերին և հնարավորինս քիչ ժամանակ անցկացնի համակարգչի կամ հեռուստացույցի առջև:

Առողջ քուն

Երեխայի քունը պետք է լիարժեք լինի, քանի որ այն նպաստում է վերականգնմանը: Մինչև երեք տարեկան երեխաները պետք է քնեն օրական 12-14 ժամ, 4-6 տարեկան երեխաները՝ 10-12 ժամ, 7-12 տարեկան երեխաները՝ առնվազն 10-11 ժամ, իսկ դեռահասները՝ 8-9 ժամ:

Նյութի աղբյուրը՝ medikforum.ru