Ինչ է ձվարանի քաղցկեղը և որոնք են դրա տեսակները, ախտանշաններն ու բուժման հիմնական մեթոդները

Ձվարանի քաղցկեղը կանանց շրջանում ամենատարածված օնկոլոգիական հիվանդություններից է, որն առավել հաճախ հանդիպում է 40 տարեկանից բարձր կանանց մոտ: Քաղցկեղի այս տեսակի տարածման հարցում մեծ դեր է խաղում գենետիկ նախատրամադրվածությունը, ուստի եթե հիվանդությունը հայտնաբերվում է որևէ մեկի մոտ, ապա հետագայում նրա դստեր մոտ քաղցկեղի զարգացման հավանականությունը նույնպես բավական բարձր է լինում:

Հետազոտությունները ցույց են տվել, որ ձվարանի քաղցկեղի զարգացման հաճախականությունը կապված է ձվազատումների հաճախականության ու ձվարանների հյուսվածքների վնասվածքների հետ, ինչը նշանակում է, որ երբևէ չծննդաբերած կանանց մոտ հիվանդանալու վտանգն ավելի մեծ է, քան մայրացած կանանց մոտ:

Ձվարանի քաղցկեղի տեսակները

Ձվարանի քաղցկեղը կարող է լինել մի քանի տեսակի: Դրանք են.

մուցինոզ,

սերոզ (առավել հաճախ հանդիպող տեսակն է),

էնդոմետրիոիդային

սպիտակաբջջային,

համակցված,

չբացահայտված բնույթի քաղցկեղ:

Նշված տեսակներից յուրաքանչյուրը կարող է լինել ինչպես բարորակ, այնպես էլ չարորակ: Բացի այդ, լինում է նաև սահմանային վիճակ, որի դեպքում ուռուցքը չի ունենում չարորակացման բարձր մակարդակ:

Ձվարանի քաղցկեղի ախտանշանները

Որպես կանոն ձվարանի քաղցկեղի դեպքում ախտանշաններն անհատական են լինում, սակայն կան նաև այնպիսինները, որոնք հանդիպում են գրեթե բոլորի մոտ: Դրանք են.

մշտական մարսելախանգարումը,

հաճախամիզությունը,

փսխումն ու փորկապությունը,

արյունոտ արտադրությունը դաշտանադադարից հետո,

ձվարանների ու գոտհատեղի հատվածում տհաճ զգացողությունները.

մեջքի ստորին հատվածում տհաճ զգացողություններն ու ցավը,

դաշտանի ուշացումները,

ցավը սեռական ակտի ժամանակ,

քաշի կտրուկ ավելացումը:

Ձվարանի քաղցկեղի բուժման միջոցները

Ձվարանի քաղցկեղի բուժման ժամանակ առավել լավ արդյունքի հասնելու համար խորհուրդ է տրվում համատեղել վիրահատությունն ու քիմիաթերապիան: Հիվանդության զարգացման վաղ փուլերում որպես կանոն հեռացնում են միայն հիվանդ օրգանը, սակայն եթե ուռուցքը տարածվել է նաև արգանդի կամ սեռական այլ օրգանների հատվածում, ապա հարկավոր է հեռացնել նաև այդ օրգանները:

Քաղցկեղի այս տեսակի քիմիական բուժման ընթացքում սովորաբար կիրառվում են դեղամիջոցներ, որոնք ոչնչացնում են չարորակ բջիջները: Նման դեղամիջոցներից են Տաքսոլը, Կարբոպլատինը, Ցիսպլատինը, Ցիկլոֆոսֆանը և այլն:

Բավական հաճախ կիրառվում է նաև ճառագայթային թերապիա, որի ընթացքում ճառագայթների ազդեցությանն ենք ենթարկվում որովայնի ու փոքր կոնքի օրգանները կամ կատարվում են ռադիոակտիվ կոլոիդների ներորովայնային ներարկումներ:

Նյութի աղբյուրը՝ onkostrahovanie.ru