Ինչպիսին կարող են լինել փոքրիկ մարտկոց կուլ տալու հետևանքները երեխաների համար (լուսանկարներ)

Երեխաների առողջության հարցերով զբաղվող CPR Kids կազմակերպության հիմնադիր տնօրեն Սառա Հանսթեդը գիտափորձի միջոցով ներկայացրել է, թե ինչպես են փոքրիկ հաբանման մարտկոցներն ազդում լորձաթաղանթի վրա՝ փորձելով այդ կերպ հորդորել ծնողներին ավելի ուշադիր լինել երեխաների նկատմամբ և թույլ չտալ, որ փոքրիկը պատահմամբ կուլ տա դրանք: Գիտափորձի համար փորձագետն օգտագործել է հավի փափկամիս և նկարների միջոցով ներկայացրել, թե ինչպես է այն արձագանքել մարտկոցի առկայությանը:

Մասնագետի խոսքով՝ այս գիտափորձը շատ կարևոր է, քանի որ նման մարտկոցները երեխաներին կոնֆետներ են հիշեցնում և նրանք հեշտությամբ կարող են կուլ տալ դրանք, ինչը կարող է ճակատագրական հետևանքներ ունենալ:

«Ես որոշեցի նման գիտափորձ անցկացնել ավագ դստերս հետ խանութ գնալուց հետ, երբ նա նկատեց, որ դարակներից մեկի վրա դրված է «հաբերով» լի բաց փաթեթ: «Միթե նրանք չեն հասկանում՝ որքան վտանգավոր է սա», - մտածեցի ես և նույն օրն իսկ արեցի այս լուսանկարները», - պատմում է Սառա Հանսթեդ, ով մասնագիտությամբ բուժքույր է:

Մարտկոցը հավի փափկամսի մեջ տեղադրված է եղել 4 ժամ, և այդ ընթացքում Սառան պարբերաբար լուսանկարել է տեղի ունեցող փոփոխությունները: Մատկոցի կործանարար ազդեցության առաջին նշաններն ի հայտ են եկել ընդամենը կես ժամ անց, իսկ ժամանակի ընթացքում վնասվածքներն ավելի ու ավելի վտանգավոր բնույթ էին ստանում:

Հավի վնասված փափկամիսը գիտափորձն սկսելուց 10 րոպե անց

30 րոպե անց

4 ժամ անց

«Ես հասկանում էի, թե որքան վտանգավոր է դա, սակայն չէի կարծում, որ ամեն ինչ այդքան արագ է տեղի ունենում», - նշում է Հանսթեդը:

Այս գիտափորձը պարզ ցույց է տվել, թե ինչ է տեղի ունենում լորձաթաղանթի հետ մարտկոցի հետ շփման հետևանքով: Երեխայի կերակրափողում կամ շնչուղիներում հայտնվելու դեպքում մարտկոցը կարող է քիմիական ու ջերմային այրվածքներ առաջացնել, իսկ որևէ հատվածում երկար մնալու դեպքում կարող է հանգեցնել վտանգավոր արյունահոսությունների: Սա է պատճառը, որ խաղալիքներ արտադրող ընկերույունները փորձում են մարտկոցի համար նախատեսված հատվածները երեխաների համար հնարավորինս անհասանելի դարձնել՝ կափարիչներն ամրացնելով նաև հատուկ պտուտակով:

Եթե երեխան պատահմամբ մարտկոց է կուլ տվել, ապա ոչ մի դեպքում չի կարելի փորձել փսխում առաջացնել նրա մոտ կամ խմելու և ուտելու որևէ բան տալ: Առաջին հերթին հարկավոր է փոքրիկին անհապաղ հիվանդանոց տանել և հնարավորության դեպքում վերցնել նաև մարտկոցի փաթեթը, ինչը կօգնի բժիշկներին ավելի արագ կողմնորոշվել, թե ինչ տեսակի մարտկոց է կուլ տվել երեխան և ինչ է հարկավոր անել: