Առողջական ինչ խնդիրներ կարող են առաջանալ օդորակիչների գործածության հետևանքով և ինչպես խուսափել դրանցից

Ամռան տապից հոգնելու դեպքում մարդիկ հաճախ ձգտում են գտնվել ավելի հով տարածքում, ինչի համար սովորաբար օդորակիչներ են կիրառվում, սակայն քչերն են գիտակցում, թե առողջական ինչ խնդիրներ կարող են առաջանալ այս սարքերի հետևանքով:

Օդորակիչները հաճախ դառնում են մրսածության ու մի շարք այլ խնդիրների զարգացման պատճառ: Գերսառեցման հետևանքով մարդիկ հաճախ են բախվում կոկորդի ցավի, հարբուխի ու բարձր ջերմության խնդրին, իսկ օդորակիչները գերսառեցման ու մրսածության ամենատարածված պատճառներից են:

Նման տհաճ հետևանքներից խուսափելու համար հարկավոր է հետևել անվտանգության տարրական կանոններին ու ճիշտ կիրառել օդորակիչները:

Առաջին հերթին հարկ է հիշել, որ անմիջապես օդի հոսքի տակ ոչ մի դեպքում չի կարելի գտնվել: Բացի այդ, օդի ընդհանուր ջերմաստիճանը չպետք է լինի 18˚C-ից ցածր: Մարդու առողջության համար անվտանգ է համարվում 18-24˚C-ը, որի դեպքում շոգը չի անհանգստացնում, սակայն գեռսառեցման ու մրսածության վտանգ նույնպես չկա:

Հարկ է հիշել, որ առավել վտանգավոր է համարվում առաջին պահը, երբ մարդը շոգ միջավայրից անմիջապես հայտնվում է օդորակիչով հովացված տարածքում: Նման դեպքերում մարմինը հաճախ պատված է լինում քրտինքի շերտով, ինչը կարող է լուրջ խնդիրներ առաջացնել և բարձրացնել գերսառեցման հավանականությունը:

Սակայն մրսածությունը միակ խնդիրը չէ, որ կարող է զարգանալ օդորակիչների պատճառով: Սովորաբար կենցաղային տարբեր պարագաների ու տեխնիկական սարքերի մեջ փոշի է կուտակվում և օդորակիչները բացառություն չեն: Այս փոշին կարող է դառնալ լուրջ ալերգիկ ռեակցիայի պատճառ, ուստի հարկավոր է շատ զգույշ լինել ու պարբերաբար օդափոխել տարածքը: Բացի այդ, անհրաժեշտ է ժամանակին մաքրել զտիչները կուտակված փոշուց, այլապես ալերգենների տհաճ ազդեցությունից խուսափել չի հաջողվի:

Հարկ է նշել, որ հատկապես վտանգավոր են ֆիթնես կենտրոններում կիրառվող օդորակիչները: Բանն այն է, որ հաճախ նման սրահներում պատուհաններ չեն լինում, ուստի օդափոխում նույնպես չի իրականացվում: Արդյունքում օդում կուտակվում են քրտինքի ու փոշու մասնիկներ, ինչպես նաև ախտածին բակտերիաներ, ինչը լուրջ վնաս է հասցնում առողջությանը: Նման դեպքերում բարձր է ոչ միայն մրսածության, այլև տարատեսակ վարակների ձեռքբերման հավանականությունը:

Այսպիսով՝ հարկ է հիշել, որ օդորակիչների կիրառման դեպքում անհրաժեշտ է անպայման հետևել անվտանգության կանոններին: Առողջական լուրջ խնդիրներից խուսափելու համար հարկավոր է ոչ միայն խուսափել սառը օդի հոսքի անմիջական ազդեցությունից, այլև վերահսկողության տակ պահել օդի ջերմաստիճանն ու հնարավորինս հաճախ օդափոխել տարածքը:

Նյութի աղբյուրը՝ medikforum.ru