Գլխուղեղի կաթվածի զարգացմանը նպաստող գործոններ, որոնց մասին քչերը գիտեն

Գլխուղեղի կաթվածն ամենավտանգավոր խանգարումներից է, որը շատ հաճախ մահվան ելք է ունենում, սակայն քչերը գիտեն, թե որ գործոններն են նպաստում դրա զարգացմանը: Ձեր ուշադրությանն ենք ներկայացնում 6 գործոն, որոնք կարող են հանգեցնել գլխուղեղի կաթվածի զարգացման:

Դիետիկ գազավորված ըմպելիքների գործածություն

Ավելի քան 80 հազար կնոջ մասնակցությամբ լայնամասշտաբ հետազոտությունները ցույց են տվել, որ օրական երկու փոքր շիշ շաքար չպարունակող գազավորված ըմպելիք օգտագործելը բարձրացնում է գլխուղեղի կաթվածի ու սրտամկանի ինֆարկտի հավանականությունն ավելի քան 30%-ով: Բացի այդ, հետազոտությունները ցույց են տվել, որ նման ըմպելիքների գործածությունը զգալիորեն վատացնում է հիշողությունն ու հանգեցնում է գլխուղեղի ապաճման:

Գերհոգնածություն

Մշտական գերհոգնածությունը կարող է բացասաբար անդրադառնալ կենտրոնական նյարդային համակարգի վրա: Գիտնականների խոսքով՝ հանգստի բացակայությունը հյուծում է նյարդային համակարգն ու նվազեցնում է դրա պաշտպանական պոտենցիալը: Շաբաթական ավելի քան 55 ժամ աշխատող մարդկանց մոտ գլխուղեղի կաթվածի հավանականությունը շատ ավելի բարձր է: Սա պայմանավորված է սթրեսի բարձր մակարդակով, ինչպես նաև առողջարար մթերք օգտագործելու և ֆիզիկական վարժություններ կատարելու համար անհրաժեշտ ժամանակի պակասով:

Գրիպ

Գիտնականները պարզել են, որ գրիպը հաճախ է նախորդում գլխուղեղի կաթվածին: Գրիպով հիվանդների մոտ հիվանդությունից հետո 15 օրվա ընթացքում գլխուղեղի կաթվածի հավանականությունը բարձր է լինում 40%-ով: Ավելին՝ գրիպից հետո անգամ մեկ տարվա ընթացքում վտանգը որոշ չափով դեռ պահպանվում է: Բժիշկների խոսքով՝ գրիպը կարող է նպաստել քներակի շերտավորմանը, ինչի հետևանքով էլ խանգարվում է արյան հոսքը դեպի գլխուղեղ:

Աղմուկ

Հետազոտությունը ցույց է տվել, որ մշտապես աղմուկի պայմաններում ապրող մարդկանց մոտ գլխուղեղի կաթվածի հավանականությունն ավելի բարձր է լինում: Պարզվել է, որ նրանց մոտ ավելի բարձր է զարկերակներում բորբոքումների մակարդակները, իսկ գլխուղեղում ակտիվ է այն հատվածը, որը պատասխանատու է սթրեսների ու հուզական արձագանքի կարգավորման համար:

Լնդերի արյունահոսություն

Բազմաթիվ հետազոտություններ ցույց են տվել, որ լնդերի արյունահոսությունների ու սրտանոթային հիվանդությունների զարգացման բարձր հավանականության միջև կա ակնհայտ կապ: Փորձագետները ենթադրում են, որ այս կապն ապահովում է բորբոքումը, որը պայմանավորված է լնդերում առկա բակտերիաներով:

Ալկոհոլի գործածություն

Ալկոհոլի չարաշահման դեպքում բարձրանում է կաթվածի այն տեսակի հավանականությունը, որը բնորոշվում է գլխուղեղային արյունազեղումով, այլ ոչ թե անոթի խցանմամբ: Ընդ որում, ալկոհոլի գործածությունը կարող է բավական լուրջ հետևանքներ ունենալ անգամ երիտասարդների դեպքում:

Նյութի աղբյուրը՝ medikforum.ru