Որոնք են եղունգների սնկային հիվանդության զարգացման պատճառներն ու առաջին ախտանշանները

11:39 • 09.07.19

Եղունգների սնկային հիվանդությունը, որը հաճախ անվանվում է դերմատոֆիտային օնիխոմիկոզ կամ պարզապես օնիխոմիկոզ, բավական տհաճ խանգարում է, որը կարող է ախտահարել ոչ միայն եղունգը, այլև մատն ամբողջությամբ:

Որպես կանոն, հիվանդության զարգացման պատճառ է դառնում դերմատոֆիտը՝ բորբոսային սնկերը, որոնք աննշան վերքերի կամ ճաքերի մեջ հայտնվելուց հետո սկսում են շատ արագ բազմանալ: Ընդ որում, տարիների ընթացքում խնդիրը միայն էլ ավելի է խորանում, ինչը պայմանավորված է լինում արյան շրջանառության վատացմամբ ու եղունգների աճի դանդաղումով:

Հիվանդության զարգացման պատճառները կարող են տարբեր լինել: Դրանց շարքին են դասվում ոտնաթաթերի էպիդերմոֆիտիան, վարակված մարդու հետ շփումը, արհեստական կտորներից պատրաստված գուլպաներ ու «չշնչող» կոշիկ կրելը, առատ քրտնարտադրությունը, շաքարային դիաբետը, իմունային համակարգի թուլացումն ու մաշկի աննշան վնասվածքները:

Սնկային հիվանդության դեպքում հարկավոր է շատ զգոն լինել խնդիրը ժամանակին նկատելու համար: Այս հիվանդությանը բնորոշ ախտանշանների շարքին են դասվում եղունգի հաստացումն ու ձևի փոփոխությունը, ինչպես նաև եղունգի շերտավորումը, փխրունությունը, մուգ գույնն ու փայլի կորուստը: Հստակ ախտորոշել հիվանդությունը կարող է միայն բժիշկը, սակայն հարկավոր է շատ զգոն լինել՝ հետագա զարգացումից խուսափելու համար: Հարկ է հիշել, որ վերանշյալ ախտանշանները բնորոշ են արդեն խորացած փուլերին, մինչդեռ սկզբնական շրջանում հիվանդության մասին կարող է հուշել եղունգների կողային հատվածներում սպիտակ կամ դեղին հատվածների առկայությունը:

Խնդիրներից խուսափելու համար մասնագետները խորհուրդ են տալիս կանանց շաբաթական մեկ անգամ մաքրել եղունգների լաքն ու թույլ տալ եղունգներին «հանգստանալ»: Նաև հարկ է հիշել, որ մահացող հյուսվածքները տհաճ հոտ են արձակում, ուստի դրա առկայության դեպքում հարկավոր է անհապաղ դիմել բժշկին:

Նյութի աղբյուրը՝ med2.ru