6 ախտանշան, որոնք հուշում են լեղապարկի աշխատանքի խանգարման մասին

Լեղապարկը լյարդից ներքև գտնվող օրգան է, որը կուտակում է ճարպերի յուրացման համար լյարդի արտադրած լեղին: Երբ ստամոքսն ու աղիները մարսում են սնունդը, լեղապարկն արտազատում է լեղին լեղածորանների միջոցով, ինչն օգնում է ճիշտ յուրացնել սնունդը: Սա բավական կարևոր օրգան է, որի ախտահարումը կարող է խիստ բացասաբար անդրադառնալ ամբողջ օրգանիզմի վրա: Սակայն բարեբախտաբար օրգանիզմը գրեթե միշտ հուշում է առկա խնդիրների մասին, ինչը թույլ է տալիս ժամանակին ախտորոշել հիվանդությունն ու միջոցներ ձեռնարկել:

Ձեր ուշադրությանն ենք ներկայացնում լեղապարկի աշխատանքի խանգարման մասին հուշող 6 ախտանշան, որոնք ոչ մի դեպքում չի կարելի անուշադրության մատնել:

1. Գլխապտույտ

Մարդը պետք է շատ ուշադիր լինի իր ինքնազգացողության նկատմամբ: Եթե սնվելուց երկու ժամ հետո, երբ մարսողության գործընթացն արդեն ավարտված է լինում, նկատվում է թուլություն, սրտխառնոց ու գլխապտույտ, ապա հարկավոր է շատ զգոն լինել, քանի որ այդ ախտանշանները կարող են պայմանավորված լինել լեղապարկի հետ կապված խնդիրներով:

2. Գազերի կուտակում ու այտուցներ

Լեղապարկի հիմնական գործառույթներից մեկը մարսողական գործընթացին օգնելն է, ուստի այս օրգանի հետ կապված ցանկացած խնդիր առաջին հերթին բացասաբար է անդրադառնում մարսողության վրա: Նման դեպքերում հաճախ է նկատվում գազերի կուտակում ու գխտոց, ինչպես նաև փորափքանք, այտուցվածություն, դանդաղկոտություն ու հոգնածության զգացում:

3. Ցավեր մեջքի, որովայնի ու աջ թևի հատվածում

Լեղապարկի աշխատանքի խանգարման մասին հուշող հիմնական ախտանշաններից են որովայնում ծանրության զգացողությունն ու ցավը, որը տարածվում է նաև մեջքի աջ կողմի և աջ ձեռքի հատվածում: Բանն այն է, որ լեղապարկը գտնվում է որովայնի աջ կողմում, ուստի բորբոքման դեպքում ցավը տարածվում է մարմնի աջ կողմում:

Այս օրգանի հետ կապված խնդիրների դեպքում երբեմն ցավը կարող է ի հայտ գալ կտրուկ ու լինել նոպայանման: Այն կարող է անհանգստացնել 15 րոպե, այնուհետև մեղմվել, մինչդեռ որոշ դեպքերում կարող է նաև պահպանվել մինչև 15 ժամ: Որպես կանոն այս ցավերը պայմանավորված են լինում լեղապարկում քարերի առկայությամբ, իսկ դրանց ուժգնությունը կախված է լինում քարերի քանակից:

4. Արտաթորանքի փոփոխություններ

Մեզի ու կղանքի հետ կապված փոփոխությունները նույնպես կարող են բավական լուրջ ախտանշան լինել, ուստի հարկավոր է շատ ուշադիր լինել: Լեղապարկի հիվանդությունները հաճախ են դրսևորվում մեզի սպիտակ գույնով ու կղանքի մոխրագույն երանգով, ինչը պայմանավորված է լինում լեղու ցածր մակարդակով: Բացի այդ, նման խանգարումների դեպքում մարդիկ հաճախ են բախվում փորլուծության խնդրին, ուստի այս ախտանշանը նույնպես չի կարելի անտեսել

5. Բերանի խոռոչի տհաճ հոտ ու տենդ

Բերանի խոռոչում տհաճ համի առկայությունն ու ոչ թարմ շնչառությունը, որից ոչ մի կերպ չի հաջողվում ազատվել, նույնպես կարող է վտանգավոր ախտանշան լինել: Եթե այս խնդիրը հանդիպում է բավական հաճախ, ապա հարկավոր է խորհրդակցել բժշկի հետ: Հատկապես զգոն է պետք լինել այն դեպքում, երբ վերոնշյալ ախտանշաններն ուղեկցվում են նաև տենդով:

6. Մաշկի դեղին երանգ

Մաշկի ու աչքերի դեղնավուն երանգը կամ դեղնուկը պայմանավորված է լինում լեղապարկում լեղածորանները խցանող քարերի առկայությամբ: Արդյունքում լեղին վերադառնում է լյարդ, որտեղից էլ կարող է հայտնվել արյան մեջ:

Վերոնշյալ ախտանշաններից ցանկացածի առկայության դեպքում խորհուրդ է տրվում դիմել մասնագետին ու չզբաղվել ինքնաբուժությամբ, քանի որ այն կարող է շատ վտանգավոր լինել առողության համար: Հարկ է հիշել, որ միայն փորձառու մասնագետը կկարողանա հստակ ախտորոշել հիվանդությունն ու նշանակել անհրաժեշտ բուժումը, որը կլինի և՛արդյունավետ, և՛ անվնաս:

Նյութի աղբյուրը՝ budetezdorovy.ru