Գիտնականները նշել են՝ որ վիտամինների դեֆիցիտն է հանգեցնում գլխացավերի

12:02 • 30.07.19

Բրիտանացի գիտնականների խոսքով՝ սաստիկ գլխացավերի դեպքում խնդրի պատճառը պարզելու համար առաջին հերթին հարկավոր է ուշադրություն դարձնել մարդու սննդակարգին ու կենսակերպին, քանի որ որոշ դեպքերում ինքնազգացողության վատթարացման պատճառ կարող է հանդիսանալ որոշակի սննդարար նյութերի դեֆիցիտը, գրում է Express պարբերականը:

Մասնագետները նշում են, որ լավ ինքնազգացողության պահպանման հարցում շատ կարևոր նշանակություն ունեն B խմբի վիտամինները, սակայն այնուամենայնիվ ամենակարևորներից են ռիբոֆլավինը (վիտամին B2), որի մակարդակի բարձրացման համար հարկավոր է օգտագործել անյուղ միս, կաթ, երիկամներ ու լյարդ, և ֆոլաթթուն (վիտամին B9), որն ընդամենը 6 ամիս ընդունելը զգալիորեն նվազեցնում է միգրենների հաճախականությունը: Բացի այդ, գիտափորձերը ցույց են տվել, որ ֆոլաթթվի պակասը կապված է լինում սրտի հիվանդությունների զարգացման հավանականության բարձրացման հետ:

Գիտնականներն ապացուցվել են նաև, որ տղամարդկանց մոտ գլխացավերի հավանականությունը կտրուկ աճում է օրգանիզմում վիտամին D-ի ցածր մակարդակի դեպքում: Նման խնդիրներից խուսափելու համար հարկավոր է սննդակարգում ներառել այս տարրով հարուստ մթերք (օրինակ՝ յուղոտ ձկնատեսակներ, հավկիթ, կաթ, հացահատիկներ և այլն):

Բացի այդ, հետազոտությունները ցույց են տվել, որ կարևորագույն տարրերի շարքին է դասվում նաև մագնեզիումը, որն օգնում է կարգավորել նյարդերի ու մկանների գործառույթները, պահպանում է արյան մեջ շաքարի մակարդակն ու կարգավորում է զարկերակային ճնշումը: Սա է պատճառը, որ այս տարրի դեֆիցիտը կապված է լինում հաճախակի գլխացավերի հետ: Նման դեպքերում մասնագետները խորհուրդ են տալիս սննդակարգում ներառել լոբազգիներ, ընկուզեղեն, սերմեր, տերևավոր բանջարեղեն ու վիտամիններով հարստացված մթերք:

Միևնույն ժամանակ մասնագետները նախազգուշացնում են, որ վիտամինային հավելումներ կիրառող մարդիկ պետք է շատ զգույշ լինեն, քանի որ նման հավելումների չարաշահումը կարող է առողջությանը լուրջ վնաս հասցնել: