Գիտնականները նշել են արտասովոր ախտանշան, որը կարող է վկայել շաքարային դիաբետի մասին

14:09 • 31.07.19

Բերանի խոռոչի տհաճ հոտը հաճախ առողջական լուրջ խնդիրների ախտանշան է լինում և հուշում է օրգանիզմում ընթացող անբարենպաստ գործընթացների մասին: Սա է պատճառը, որ նման խնդրի դեպքում հարկավոր է անպայման բուժզննում անցնել հիմնական հիվանդության հայտնաբերման համար:

Մասնագետների խոսքով՝ այս ախտանշանը կարող է վկայել անգամ այնպիսի վտանգավոր հիվանդության մասին, ինչպիսին է երկրորդ տիպի շաքարային դիաբետը: Այս խանգարումը դրսևորվում է արյան մեջ շաքարի ու ինսուլինի մակարդակների խանգարմամբ, սակայն կարող է բավական երկար ժամանակ աննկատ մնալ: Վաղ փուլերում շաքարային դիաբետն ախտորոշելը գրեթե անհնարին է, ուստի հարկավոր է շատ զգոն լինել ու հետևել օրգանիզմի ազդանշաններին:

Շաքարային դիաբետի դեպքում բերանի խոռոչի տհաճ հոտի ի հայտ գալը կապված է լինում տիտրա կետոնային մարմինների աճով, ինչը պայմանավորված է արյան մեջ չօգտագործված գլյուկոզայի կուտակմամբ: Ընդ որում, նման տհաճ հոտ կարող է նկատվել ինչպես առաջին տիպի, այնպես էլ երկրորդ տիպի շաքարային դիաբետի դեպքում:

Բժիշկները նշում են, որ շաքարային դիաբետով տառապողների մոտ փափուկ հյուսվածքների արյունատար անոթներում խանգարվում է արյան միկրոշրջանառությունը: Բացի այդ, հաճախ նվազում է թքարտադրությունը, ինչը հանգեցնում է ատամների էմալի ֆտորով հարստացվելու գործընթացի խանգարման: Արդյունքում հաճախ զարգանում են պարօդոնտիտ, կարիես և բերանի խոռոչի այլ բորբոքային հիվանդություններ: Այս բորբոքային գործընթացները կարող են ոչ միայն նվազեցնել ինսուլինի արդյունավետությունը, այլև դառնալ բերանի խոռոչի շատ տհաճ հոտի պատճառ:

Միևնույն ժամանակ հարկ է հիշել, որ նշված խնդիրները կարող են և պայմանավորված չլինել շաքարային դիաբետով, ուստի հստակ պատկեր ստանալու համար հարկավոր է հետևել օրգանիզմի տված այլ հուշումներին: Այս հիվանդության մասին վկայող ամենատարածված ախտանշաններից են քաշի կտրուկ կորուստը, անհագ ծարավը, հաճախամիզությունը, մշտական հոգնածությունն ու քաղցը: Նշված ախտանշանների ի հայտ գալու դեպքում հարկավոր է անպայման բուժզննում անցնել ու անհրաժեշտության դեպքում սկսել բուժումը:

Նյութի աղբյուրը՝ med2.ru