Զարկերակային գերճնշման՝ հիպերտոնիայի վաղ ախտանշանները

Զարկերակային բարձր ճնշումը կամ հիպերտոնիան բավական տարածված հիվանդություն է, որը կարող է առաջանալ ինչպես կանանց, այնպես էլ տղամարդկանց մոտ: Այն առաջանում է, երբ արյունը սկսում է զարկերակների միջով հոսել նորմայից բարձր ճնշումով:

Հարկ է նշել, որ վերջին տարիներին հիվանդությունը շատ է «երիտասարդացել»: Մշտական սթրեսները, նստակյաց ապրելակերպը, վնասակար սնունդը, ծխելն ու այլ վատ սովորությունները հիպերտոնայի վաղ զարգացմանը նպաստող գերծոններն են, ինչի հետևանքով հիվանդությունն ի հայտ է գալիս արդեն 30-40 տարեկանից հետո:

Այս հիվանդությունը վտանգավոր է նրանով, որ այն դանդաղ է ընթանում և առաջանում աստիճանաբար, իսկ բուժման բացակայության դեպքում կարող է հանգեցնել լուրջ բարդությունների և վտանգել հիվանդի կյանքը: Հաճախ հիվանդությունն ընթանում է առանց ախտանշանների, սակայն կան վաղ նշաններ, որոնց հարկավոր է ուշադրություն դարձնել: Սա է պատճառը, որ անհրաժեշտ է ժամանակին հայտնաբերել հիպերտոնիայի նախանշանները և ժամանակին էլ բուժել:

Ճնշման աստիճանները նորմայի և հիպերտոնիայի դեպքում

·  Նորմալ ճնշում՝ մոտ 120/80 մմ սս,

·  Նախահիպերտոնիա՝ 120–139/80–89 մմ սս.,

·  1-ին կարգի հիպերտոնիա՝ 140–159/90–99 մմ սս.,

·  2-րդ կարգի հիպերտոնիա՝ 160 և ավել/100 և ավել մմ սս.:

Շատ հաճախ հիվանդության սկիզբը հիվանդները չեն նկատում, քանի որ ուշադրություն չեն դարձնում վաղ ախտանշաններին:

Ձեզ ենք ներկայացնում այդ ախտանշաններից մի քանիսը:

Վատ ինքնազգացողությունն ու հոգնածությունը

Շատ հաճախ հիվանդության առաջին ախտանշանը առանց լուրջ պատճառի հոգնածությունն է: Մարդը դառնում է դյուրագրգիռ, գիշերները նա տառապում է անքնությամբ, իսկ կեսօրին նկատվում է քնկոտություն, կենտրոնացման կորուստ:

Շատերն այս ախտանշանները վերագրում են հասարակ հոգնածությանը և ուշադրություն չեն դարձնում, սակայն եթե արյան ճնշումը շարունակում է ամեն պարագայում մնալ բարձր (140/90 մմ սս.), ապա ամենայն հավանականությամբ սա հիպերտոնիայի վաղ փուլն է:

Գլխացավեր

Հիպերտոնիայի ժամանակ հաճախ նկատվում են նաև գլխացավեր, որոնք կարող են լինել «սեղմող», սուր և մղկտուն: Ամենից հաճախ ցավը նկատվում է ծոծրակի և քունքերի հատվածում:

Տեսողության խանգարում

Գլխացավերի հետ մեկտեղ, հաճախ ախտորոշվում են նաև տեսողության խանգարումներ: Վաղ փուլերում սա կարող է արտահայտվել աչքերի կարմրությամբ, տեսողության վատացմամբ և այլ խանգարումներով: Սա հաճախ պայմանավորված է լինում տեսողական նյարդի և ցանցաթաղանթի անոթների սեղմվածությամբ: Բացի այդ, կարող են նաև նկատվել աչքի հատակի և ցանցաթաղանթի փոփոխություններ: Այս դեպքերում լինում է գլխուղեղի կաթվածի կամ տեսողական լուրջ խնդիրների առաջացման վտանգ (ընդհուպ մինչև կուրություն):

«Աղմուկ» ականջներում

Հիվանդները կարող են ականջներում աղմուկ լսել, ինչը կապված է լսողական համակարգի անոթների սեղմվելու հետ:

Ցավը կրծքավանդակի հատվածում և սրտի զարկերի ռիթմի խանգարումը

Մյուս ախտանշանների հետ մեկտեղ, հիվանդների մոտ ի հայտ են գալիս նաև ցավեր կրծքավանդակի ձախ հատվածում և սրտի զարկերի արագացում: Սա նշանն է այն բանի, որ բարձր ճնշումը սրտամկանի և զարկերակների լուրջ փոփոխություններ է առաջացրել, ինչի արդյունքում կարող են առաջանալ սրտի իշեմիկ հիվանդություն, ստենոկարդիա կամ սրտային անբավարարություն:

Շատ կարոր է կարողանալ ժամանակին հայտնաբերել արյան բարձր ճնշման ախտանշանները: Հարկ է հիշել, որ հիպերտոնիան կարող է հանգեցնել շատ ավելի լուրջ խնդիրների, որոնք կարող են կյանքի համար վտանգ ներկայացնել: Դրանցից են.

·  Սրտային քրոնիկ անբավարարությունը,

·  Հիշողության ու մտածողության խանգարումները,

·  Տեսողության խնդիրները,

·  Սրտի նոպաներն ու կաթվածը,

·  Մետաբոլիկ համախտանիշը և այլն:

Նյութի աղբյուրը՝ all-4-woman.ru