Որոնք են մաստոպաթիայի մասին հուշող առաջին ախտանշանները

12:04 • 29.08.19

Մաստոպաթիան համարվում է 18-45 տարեկան կանանց մոտ կրծքագեղձի ամենահաճախ հանդիպող ախտաբանություններից մեկը: Այս հիվանդության վաղ ախտորոշումը թույլ է տալիս ժամանակին միջոցներ ձեռնարկել, ուստի մասնագետները ներկայացրել են այն ախտանշանները, որոնք կօգնեն հայտնաբերել մաստոպաթիան զարգացման վաղ փուլերում:

Մաստոպաթիան զարգանում է հորմոնալ խանգարման ֆոնին, որի պատճառով տեղի են ունենում պրոգեստերոնի ու էստրոգենի մակարդակների տատանումներ: Հիվանդության զարգացմանը կարող են նպաստել վահանագեղձի, մակերիկամների, ձվարանների աշխատանքի խանգարումները, լյարդի հիվանդությունները, ժառանգական նախատրամադրվածությունը, հղիության հաճախակի ընդհատումները կամ հղիության բացակայությունը, սթրեսը, կրծքագեղձերի վնասվածքները, վնասակար սովորություններն ու ավելորդ քաշը:

Զարգացման սկզբնական փուլում հիվանդությունը որևէ կերպ չի դրսևորվում, ինչը բարդացնում է հետագա բուժումը: Կանայք պետք է շատ զգոն լինեն ու ուշադրություն դարձնեն այնպիսի ախտանշաններին, ինչպիսին են տրամադրության կտրուկ փոփոխությունը, նյարդային լարվածությունը, կրծքագեղձում ծանրության զգացողությունը կամ մղկտուն ցավը, ինչպես նաև կրծքի ձևի ու չափի փոփոխությունը: Ավելի ուշ ի հայտ են գալիս այնպիսի տհաճ ախտանշաններ, ինչպիսին են պտուկներից նկատվող արտադրությունը, գեղձերի չափի մեծացումն ու թևատակերի հատվածի չմեղմվող ցավը:

Այս հիվանդությունն առանձնապես լուրջ վտանգ չի ներկայացնում, սակայն համապատասխան բուժման բացակայության դեպքում կարող է վերափոխվել քաղցկեղի: Մասնագետներն ընդգծում են, որ մաստոպաթիայի ախտանշաններն ավելի հեշտ է նկատել դաշտանի ժամանակ: Հիվանդությունը բուժվում է մի քանի եղանակով, սակայն սովորաբար բուժումն սկսվում է մաստոպաթիային ուղեկցող հիվանդությունների ու խանգարումների բուժումից:

Նյութի աղբյուրը՝ actualnews.org