Առողջական ինչ խնդիրների մասին կարող են հուշել արտասովոր սննդային նախասիրությունները

Մասնագետների խոսքով՝ մարդու սննդային նախասիրություններն անմիջականորեն կապված են նրա առողջական վիճակի հետ: Այսպես՝ որոշակի համային նախասիրությունները կարող են վկայել օրգանիզմում տեղի ունեցող փոփոխությունների, ինչպես նաև այս կամ այն տարրի դեֆիցիտի մասին:

Բժիշկները հիշեցնում են, որ բոլոր սննդարար նյութերի ու միկրոտարրերի բավարար քանակության դեպքում օրգանիզմը հավելյալ սնուցման կարիք չի ունենա, ուստի ոչ մի դեպքում չի կարելի անտեսել որևէ որոշակի մթերք ուտելու սաստիկ ցանկությունը: Ավելին՝ որոշ դեպքերում նման ցանկությունները կարող են հուշել տարբեր հիվանդությունների մասին, ուստի հարկավոր է շատ զգոն լինել:

Որևէ քաղցր մթերք ուտելու սաստիկ ցանկությունը կարող է պայմանավորված լինել աղեստամոքսային տրակտի խնդիրներով, որոնք կապված են բարձր թթվայնության հետ: Բացի այդ, քաղցրի սուր պահանջ կարող է նկատվել նաև սթրեսի, ինչպես նաև մտավոր ու նյարդային գերլարվածության դեպքում: Բանն այն է, որ նման գերծանրաբեռնվածության դեպքում օրգանիզմն ակտիվ կերպով վատնում է շաքարը, ինչի հետևանքով էլ հավելյալ գլյուկոզայի կարիք է ունենում:

Բացի այդ, հետազոտությունները ցույց են տվել, որ քաղցրի պահանջ նկատվում է այն մարդկանց մոտ, որոնց հարազատների շրջանում կան ալկոհոլային կախվածություն ունեցողներ ու դեպրեսիաներով տառապողներ:

Որևէ յուղոտ բան ուտելու սաստիկ ցանկությունը կարող է վկայել կալցիումի դեֆիցիտի մասին: Բանն այն է, որ կալցիումի յուրացման համար օրգանիզմին ճարպ է հարկավոր: Բացի այդ, նման մթերքի պահանջ է առաջանում նաև ճարպային միջավայրում լուծվող վիտամինների դեֆիցիտի և էներգիայի պակասի դեպքում: Հենց սա է պատճառը, որ քնի պակասի դեպքում մարդիկ յուղոտ մթերք օգտագործելու ցանկություն են ունենում:

Եթե նկատվում է որևէ դառը մթերք ուտելու սաստիկ ցանկություն, ապա խնդիրը կարող է պայմանավորված լինել օրգանիզմի ինտոքսիկացիայով: Հաճախ նման դեպքերում օրգանիզմը փորձում է ազատվել հիվանդություններից հետո կամ սննդի միջոցով օրգանիզմում հայտնված տոքսիններից:

Կծու մթերք ուտելու ցանկություն է առաջանում մարսողական համակարգը մեծ քանակությամբ սննդով ծանրաբեռնելուց հետո, իսկ թթու մթերքի նկատմամբ հակվածությունը հուշում է վիտամին C-ի և մագնեզիումի պակասի, ինչպես նաև իմունային համակարգի թուլացման մասին: Բացի այդ, եթե թթու մթերք ուտելու ցանկությունը պահպանվում է բավական երկար ժամանակ, ապա հարկավոր է ստուգել նաև լեղապարկի և լյարդի վիճակը, քանի որ այն կարող է պայմանավորված լինել նաև այս օրգանների հետ կապված խնդիրներով:

Որևէ աղի մթերք ուտելու սաստիկ ցանկությունը կարող է վկայել օրգանիզմի ջրազրկման կամ քլորիդների դեֆիցիտի մասին: Բացի այդ, աղի մթերքի նկատմամբ անսպասելի սերը կարող է վկայել նաև միզասեռական համակարգում վարակի օջախի առկայության մասին: Այս դեպքում խնդիրը կարող է պայմանավորված լինել շագանակագեղձի բորբոքմամբ, ցիստիտով կամ արգանդի հավելումների բորբոքումներով:

Նյութի աղբյուրը՝ medikforum.ru