Լավագույն ժողովրդական բաղադրատոմսերն արյան մեջ խոլեստերինի մակարդակը կարգավորելու համար

Արյան մեջ խոլեստերինի մակարդակի բարձրացումը կարող է բավական լուրջ խնդիրներ առաջացնել, ուստի այս ցուցանիշը հարկավոր է մշտապես վերահսկողության տակ պահել: Սովորաբար խոլեստերինի մակարդակի կարգավորման համար նշանակվում են հատուկ դեղամիջոցներ, սակայն բժիշկները վստահ են, որ հիանալի արդյունքի կարելի է հասնել նաև ժողովրդական բաղադրատոմսերի կիրառման շնորհիվ:

Ձեր ուշադրությանն ենք ներկայացնում մի քանի ժողովրդական դեղամիջոց, որոնք կօգնեն կարգավորել արյան մեջ խոլեստերինի մակարդակն ու նվազեցնել սրտանոթային հիվանդությունների զարգացման հավանականությունը:

Թերխաշ բրինձ

Արյան մեջ խոլեստերինի մակարդակը կարգավորող լավագույն միջոցներից մեկն առանց աղի, համեմունքների ու յուղի թերխաշ բրինձն է, որը հարկավոր է ուտել առավոտյան նախաճաշի փոխարեն: Օրգանիզմն ավելորդ խոլեստերինից մաքրելու այս կուրսը տևում է մեկ ամիս:

Խաշած լոբի

Շատ արդյունավետ է նաև խաշած լոբին: Հարկավոր է երեկոյան կես բաժակ լոբին թրջել, առավոտյան քամել, ավելացնել թարմ ջուր ու դնել կրակին մինչև լոբին խաշվի: Խաշած լոբին հարկավոր է բաժանել երկու մասի և ուտել օրվա ընթացքում առանց աղի, համեմունքների ու յուղի: Կուրսի տևողությունն է մեկ ամիս:

Լորենու ծաղիկներ

Խոլեստերինի դեմ պայքարում հիանալի օգնական կարող են լինել նաև լորենու ծաղիկները: Հարկավոր է ծաղիկները չորացնել, այնուհետև սրճաղացով մանրացնել և ընդունել օրական երեք անգամ (ուտելու ընթացքում) մեկական թեյի գդալ:

Խատուտիկի արմատ

Ոչ պակաս արդյունավետ է նաև խատուտիկի արմատը: Այն հարկավոր է չորացնել, այնուհետև մանրացնել ու փոշի դարձնել և ընդունել օրական չորս անգամ ½ գդալ ուտելուց կես ժամ առաջ: Խատուտիկի արմատն ընդունելուց հետո հարկավոր է մեծ քանակությամբ ջուր խմել: Այս դեղաբույսով բուժման կուրսի տևողությունն է 4-6 ամիս:

Կտավատի սերմեր

Այս սերմերը ոչ միայն շատ համեղ են այլև անչափ օգտակար: Հարկավոր է դրանք սրճաղացով լավ մանրացնել և ընդունել օրական 1-2 թեյի գդալ՝ ավելացնելով սննդին: Նման բուժման կուրսը տևում է առնվազն կես տարի:

Ձմերուկ

Տարվա այս եղանակին խոլեստերինի մակարդակի կարգավորման հիանալի միջոց կարող է լինել նաև ձմերուկը, որը հարկավոր է ուտել ամեն օր: Ընդ որում, ձմերուկը ոչ միայն նվազեցնում է խոլեստերինի մակարդակը, այլև մաքրում է անոթներն աթերոսկլերոտիկ վահանիկներից ու դուրս է բերում օրգանիզմում կուտակված տոքսիններն ու շլակները:

Լոռամրգի հյութ

Շատ օգտակար է նաև լոռամրգի թարմ հյութը, ուստի այս հատապտուղների հասունացման սեզոնին խորհուրդ է տրվում օրական երեք անգամ ուտելուց կես ժամ առաջ ¼ բաժակ լոռամրգի թարմ քամած հյութ խմել՝ ավելացնելով դրան եռացրած ջուր:

Նյութի աղբյուրը՝ hronika.info