Որ դեպքերում է հազը հուշում քաղցկեղի զարգացման մասին

18:52 • 05.09.19

Հազը համարվում է մրսածության հիմնական ախտանշանը, իսկ մարդիկ հաճախ պատշաճ ուշադրություն չեն դարձնում այս հիվանդությանը և չեն հետևում բժիշկների ցուցումներին: Սա է պատճառը, որ հիվանդները հաճախ են անտեսում հազը, մինչդեռ լինում են դեպքեր, երբ այն վկայում է շատ ավելի վտանգավոր խանգարումների մասին, այդ թվում՝ թոքի քաղցկեղի:

Վիճակագրական տվյալներով՝ ներկայում օնկոլոգիական հիվանդություններով տառապողների թիվ բավական մեծ է և շարունակում է աճել, սակայն խնդիրն այն է, որ շատերն անգամ գլխի չեն ընկնում հիվանդության առկայության մասին, քանի որ կան քաղցկեղի տեսակներ, որոնք երկար ժամանակ զարգանում են առանց ախտանշանների: Նման տեսակներից մեկն է թոքի քաղցկեղը, որը չունի միայն իրեն բնորոշ որևէ ակնհայտ ախտանշան, ինչի հետևանքով ոչ միշտ է ժամանակին հայտնաբերվում:

Այնուամենայնիվ մասնագետները նշում են, որ գոյություն ունի հազի ու շնչառական համակարգի հետ կապված չորս ախտանշան, որոնք կարող են վկայել թոքի քաղցկեղի զարգացման մասին, ուստի դրանք իմանալը թույլ կտա ժամանակին հայտնաբերել խնդիրն ու միջոցներ ձեռնարկել: Այդ ախտանշաններն են.

ավելի քան երեք շաբաթ չմեղմվող հազը,
թքի կամ խորխի մեջ նկատվող արյան հետքերը,
կրծքավանդակի ցավը, որն ի հայտ է գալիս կամ ուժգնանում է հազի ժամանակ,
հևոցը, հատկապես, եթե այն նկատվում է նախկինում հեշտ տրվող գործողությունները կատարելիս:

Վերոնշյալ ախտանշանները որպես կանոն կապված են լինում առողջական լուրջ խնդիրների հետ, ուստի դրանք ոչ մի դեպքում չի կարելի անուշադրության մատնել, սակայն մասնագետները պնդում են, որ անգամ նման ախտանշանների կամ որևէ այլ տհաճ զգացողության բացակայության դեպքում հարկավոր է անպայման պարբերաբար պրոֆիլակտիկ բուժզննում անցնել: Հարկ է հիշել, որ քաղցկեղն այն հիվանդություններից է, որը կանխարգելելն ու վաղ փուլերում բուժելը շատ ավելի հեշտ է, քան հետագայում դրա առաջացրած բարդությունների դեմ պայքարելը: Սա է պատճառը, որ հարկավոր է շատ զգոն լինել և հետևել օրգանիզմի տված ազդանշաններին:

Նյութի աղբյուրը՝ med2.ru