Որոնք են սրտամկանի ինֆարկտի և գլխուղեղի կաթվածի զարգացմանը նպաստող գործոններն ու այդ խանգարումների հիմնական ախտանշանները

Սրտանոթային հիվանդությունները համարվում են ամբողջ աշխարհում մարդկանց մահացության հիմնական պատճառը, ուստի Առողջապահության համաշխարհային կազմակերպության մասնագետները ներկայացրել են այս հիվանդությունների զարգացմանը նպաստող ռիսկային գործոններն ու դրանց հիմնական ախտանշանները: Մասնագետներն ընդգծում են, որ այս տեղեկությունն իմանալը կօգնի կանխել խնդրի զարգացումը կամ հայտնաբերել այն ժամանակին ու միջոցներ ձեռնարկել:

Սրտանոթային հիվանդությունների առավել վտանգավոր հետևանքներն են սրտամկանի ինֆարկտն ու գլխուղեղի կաթվածը, որոնք զարգանում են գլխուղեղին կամ սրտամկանին արյուն մատակարարող անոթների խցանման հետևանքով: Այդ խցանումները տեղի են ունենում անոթների պատերին ճարպային նստվածքի առաջացման պատճառով, ինչն էլ ի վերջո հանգեցնում սրտամկանի ինֆարկտի կամ իշեմիկ կաթվածի: Գլխուղիղ կաթվածի մյուս տեսակը՝ հեմոռագիկ կաթվածը պայմանավորված է լինում գլխուղեղի անոթների արյունահոսությամբ:

Սրտամկանի ինֆարկտը, որպես կանոն, պայմանավորված է լինում դրա զարգացմանը նպաստող մի քանի գործոնի համադրմամբ: Այդ գործոններն են.

ծխախոտի չարաշահումը

անառողջ սննդակարգն ու ճարպակալումը,

ալկոհոլի գործածությունը,

ֆիզիկական ակտիվության պակասը,

զարկերակային բարձր ճնշումը,

շաքարային դիաբետը,

հիպերլիպիդեմիան:

Միևնույն ժամանակ վերոնշյալ գործոններից բացի սրտանոթային հիվանդությունների զարգացման հավանականության բարձրացման կարող են հանգեցնել նաև սթրեսն ու ժառանգական նախատրամադրվածությունը:

Գիտականորեն ապացուցված է, որ ծխախոտի ու ալկոհոլի բացառումը, սննդակարգում աղի գործածության սահմանափակումը, մրգերով ու բանջարեղենով հարուստ սննդակարգն ու ֆիզիկական ակտիվությունը նվազեցնում են այս հիվանդությունների առաջացման հավանականությունը:

Ինչպես նշում են մասնագետները, սրտանոթային հիվանդությունները կարող են բավական աննկատ զարգանալ և ի վերջո հանգեցնել կաթվածի: Սա է պատճառը, որ հարկավոր է շատ զգոն լինել ու սովորել տարբերել այս խանգարումների մասին հուշող ախտանշանները:

Սրտամկանի կաթվածի ախտանշաններն են.

ցավը կամ տհաճ զգացողությունները կրծքավանդակի կենտրոնական հատվածում,

ցավը կամ տհաճ զգացողությունները ձեռքերի, ձախ ուսի, արմունկների, ծնոտի կամ մեջքի հատվածում,

ծանր շնչառությունը կամ օդի պակասը,

սրտխառնոցը կամ փսխումը,

գլխապտույտը կամ գիտակցության կորուստը,

գունատությունն ու սառը քրտինքը:

Հարկ է նշել, որ կանանց մոտ այս խանգարումն առավել հաճախ դրսևորվում է այնպիսի ախտանշաններով, ինչպիսին են օդի պակասը, սրտխառնոցը, փսխումն ու մեջքի և ծնոտի ցավերը:

Գլխուղեղի կաթվածի ախտանշաններն են.

դեմքի, ձեռքի կամ ոտքի կտրուկ թուլությունը (առավել հաճախ մարմնի մի կողմում),

դեմքի, ձեռքի կամ ոտքի անսպասելի թմրածությունը,

ցրված գիտակցությունը,

խոսքի արտաբերման կամ ընկալման հետ կապված խնդիրները,

տեսողական ընկալման խնդիրները,

քայլվածքի հետ կապված խնդիրները,

գլխապտույտը, հավասարակշռության կամ կոորդինացիայի կորուստը,

անհասկանալի ուժգին գլխացավը,

գիտակցության կորուստը կամ մթագնումը:

Վերոնշյալ ախտանշանները վկայում են լուրջ խնդրի մասին, ուստի դրանք անտեսելը կարող է անդառնալի հետևանքներ ունենալ: Սա է պատճառը, որ առաջին իսկ ախտանշանի դեպքում հարկավոր է անհապաղ դիմել բժշկին ու միջոցներ ձեռնարկել հետագա բարդություններից խուսափելու համար:

Նյութի աղբյուրը՝ med2.ru