Որոնք են այտուցների հիմնական տեսակներն ու դրանց առաջացման պատճառները

Այտուցները մարդու օրգանիզմի հյուսվածքներում հեղուկի կուտակումներն են, որոնք կարող են առաջանալ ամենատարբեր պատճառներով: Սովորաբար այտուցները մարդիկ պատկերացնում են աչքերի տակ առաջացած «պարկերի» տեսքով, մինչդեռ իրականում դրանք կարող են լինել տարբեր տեսակների: Այդ տեսակները տարբերելը շատ կարևոր է, քանի որ միայն այդ դեպքում հնարավոր կլինի մեկընդմիշտ ազատվել խնդրից, ուստի ձեր ուշադրությանն ենք ներկայացնում այդ տեսակներից մի քանիսն ու դրանց առաջացման պատճառները:

Սրտամկանի հիվանդություններով պայմանավորված այտուցներ

Սրտամկանի աշխատանքի խանգարման դեպքում սովորաբար այտուցվում են ստորին վերջույթները: Ընդ որում, առավել հաճախ այտուցներն ի հայտ են գալիս երեկոյան ժամերին: Բացի այդ, սրտի հիվանդությունների դեպքում այտուցների հետ մեկտեղ կարող են նկատվել նաև մաշկի կապտավուն երանգ ու վերջույթների սառնություն

Երիկամների հիվանդություններով պայմանավորված այտուցներ

Զարգացման վաղ փուլերում այս հիվանդությունները դրսևորվում են աչքերի տակ առաջացած «պարկերով», իսկ երբեմն էլ մաշկի գունատությամբ: Հիվանդության զարգացման հետ մեկտեղ այտուցներն ավելի ակնհայտ են դառնում: Ի վերջո այտուցվում են ոչ միայն կոպերը, այլև դեմքն ամողջությամբ, ինչպես նաև վերջույթները:

Հիպոպրոտեինեմիայով պայմանավորված այտուցներ

Այտուցների այս տեսակն ի հայտ է գալիս ոտքերին, ձեռքերին, դեմքին ու գոտկատեղի հատվածում: Դրանց առաջացման պատճառ կարող են դառնալ նևրոտիկ համախտանիշը, ցիռոզը կամ արյան մեջ սպիտակուցի ցածր մակարդակը (թերսպիտակուցարյունություն, հիպոպրոտեինեմիա): Բացի այդ, այս տեսակին վերագրվող այտուցների շարքին են դասվում նաև հիպոթիրեոզով (վահանագեղձի աշխատանքի խանգարման տեսակներից մեկը) պայմանավորված այտուցները, սակայն այս դեպքում դրանք ուղեկցվում են նաև հիվանդությանը բնորոշ այլ ախտանշաններվ, այդ թվում՝ թուլությամբ, քնկոտությամբ, դանդաղասրտությամբ (բրադիկարդիա) և մաշկի չորությամբ:

Երակային այտուցներ

Ձեռքերի արտահայտված անոթները շատերին ծանոթ երևույթ են, սակայն քչերը գիտեն, որ այս կերպ են դրսևորվում երակային այտուցները: Նման այտուցներն ավելի ակնհայտ են դառնում կանգնած ժամանակ: Բացի այդ, այտուցների այս տեսակը կապված է երակների վարիկոզ լայնացման զարգացման հետ:

Ավշային այտուցներ

Նման այտուցներն առաջանում են ոտնաթաթերի, կոճերի ու ձեռքերի հատվածում: Դրանց սեղմելու դեպքում չի մնում այտուցների մյուս տեսակներին բնորոշ հետք: Բացի այդ, այս տեսակի դեպքում այտուցները չեն անհետանում անգամ վերջույթները վեր բարձրացնելու դեպքում:

Ճարպային այտուցներ

Այտուցների այս տեսակը բնորոշ է միայն կանանց: Այս դեպքում մաշկի տակ առաջանում են հանգույցներ ու պնդացումներ, որոնք հաճախ ցավոտ զգացողություններ են առաջացնում:

Հարկ է հիշել, որ այտուցը հիվանդություն չէ, այլ որևէ խանգարման հետևանք ու դրա մասին հուշող ախտանշան, ուստի դրանից ազատվելու համար հարկավոր է առաջին հերթին բուժել հիմնական հիվանդությունը: Սա է պատճառը, որ ցանկացած տեսակի այտուցի առաջացման դեպքում հարկավոր է դիմել մասնագետին ու չզբաղվել ինքնաբուժությամբ: Երակային այտուցների, ինչպես նաև սրտամկանի, երիկամների ու լյարդի հիվանդություններով պայմանավորված այտուցների դեպքում որպես առաջին բուժօգնության միջոց շատ արդյունավետ կարող են լինել միզամուղ դեղամիջոցները, սակայն դրանք կազատեն միայն այտուցներից և չեն բուժի դրանց պատճառ հանդիսացոեղ հիմնական հիվանդությունը:

Նյութի աղբյուրը՝ medikforum.ru