Առողջական ինչ խնդիրներով կարող են պայմանավորված լինել ստամոքսի ցավերը

Ստամոքսի ցավը կարող է պայմանավորված լինել թունավորմամբ կամ մեծ քանակությամբ սննդի ընդունմամբ, ինչպես նաև որոշ վտանգավոր հիվանդություններով, ինչպիսին են գաստրիտը, ենթաստամոքսային գեղձի բորբոքումն ու խոցը: Այս խնդրից ազատվելու համար հարկավոր է հստակ պարզել դրա առաջացման պատճառն ու անմիջապես միջոցներ ձեռնարկել, ուստի  մասնագետները ներկայացրել են, թե առողջական որ խնդիրների դեպքում են սովորաբար նկատվում ստամոքսի ցավեր:

Գաստրիտ ու խոց

Ինչպես գաստրիտի, այնպես էլ խոցային հիվանդության դեպքում ցավն ի հայտ է գալիս սննդի ընդունումից հետո: Գաստրիտի դեպքում խոսքը ստամոքսի լորձաթաղանթի բորբոքման մասին է, իսկ խոցային հիվանդության դեպքում՝ ֆիզիկական ախտահարման, վնասվածքի ու արյունահոսությունների:

Գաստրիտի դեպքում ցավը կարող է անհանգստացնել հիվանդին գրեթե անդադար, մինչդեռ խոցային հիվանդությունն առավել հաճախ ակտիվանում է գիշերվա ժամերին: Բացի այդ, գաստրիտը հաճախ ուղեկցվում է փորափքանքով, այրոցող, գխտոցով, սրտխառնոցով ու լեզվի վրա փառի առկայությամբ, մինչդեռ խոցային հիվանդության դեպքում հաճախ նկատվում են ոչ միայն ցավեր, այլև սրտխառնոց, փսխում, փորկապություն ու ֆիզիկական թուլություն:

Տասներկումատնյա աղիքի խոցային հիվանդություն

Եթե ստամոքսի ցավերն ի հյատ են գալիս ուտելուց մի քանի ժամ հետո, ապա դրանք կարող են պայմանավորված լինել տասներկումատնյա աղիքի խոցով, որն առաջանում է աղիքի թաղանթի վրա թթուների ներգործության հետևանքով: Այս հիվանդության դեպքում ցավը կարող է տարածվել նաև սրտամկանի ու մեջքի հատվածում: Բացի այդ, այս դեպքում կարող է նկատվել նաև գխտոց, փորափքանք, ստամոքսի այրոց, քնի խանգարումներ ու քաշի նվազում:

Այրոց

Ստամոքսի այրոցին բնորոշ ցավերն ու լորձաթաղանթի գրգռումը կարող են պայմանավորված լինել մեծ քանակությամբ սննդի ընդունմամբ, ինչպես նաև թթու ու կծու մթերքի, ինչպես նաև սուրճի ու ալկոհոլի գործածությամբ: Բացի այդ, ցավոտ զգացողությունների պատճառ կարող է դառնալ անգամ չափազանց նեղ հագուստը:

Ստամոքսի սուր ցավեր

Մասնագետների խոսքով՝ ստամոքսի սուր ցավերը կարող են պայմանավորված լինել տարբեր պատճառներով: Կտրուկ ի հայտ եկած սուր ցավը կարող է վկայել ենթաստամոքսային գեղձի բորբոքման, խոլեցիստիտի կամ տասներկումատնյա աղիքի խոցային հիվանդության մասին: Կարճատև ցավոտ սպազմները խորը շնչելու կամ նստած դիրքից կանգնելու ժամանակ կարող են պայմանավորված լինել բորբոքային գործընթացներով: Ստամոքսի սպազմները բնորոշ են աղեստամոքսային վարակներին, իսկ մի քանի օր շարունակ տանջող, այնուհետև աստիճանաբար մեղմվող ցավերը՝ կոլիտին (հաստ աղիքների բորբոքում): Բացի այդ, շատ վտանգավոր է ստամոքսի սուր ցավը, որի դեպքում որովայնը կարծես քարանում է, իսկ հիվանդը չի կարողանում ուղիղ կանգնել: Նման ցավը կարող է պայմանավորված լինել որդանման ելունի բորբոքմամբ, որի դեպքում հարկավոր է անհապաղ միջոցներ ձեռնարկել:

Նյութի աղբյուրը՝ medikforum.ru