5 վտանգավոր հիվանդություն, որոնք մարդիկ հաճախ շփոթում են մրսածության հետ

Մրսածությունն ամենատարածված հիվանդություններից մեկն է, որը սովորաբար դրսևորվում է մի շարք տհաճ ախտանշաններով, այդ թվում՝ թուլությամբ, բարձր ջերմությամբ, հազով, քթի փակվածությամբ և այլն: Նման ախտանշանները մարդիկ սովորաբար անուշադրության են մատնում՝ չհամարելով մրսածությունը լուրջ խնդիր, մինչդեռ քչերին է հայտնի, որ երբեմն այս ախտանշանները բնավ կապված չեն լինում մրսածության հետ:

Ինչպես գրում է Medikforum.ru կայքը՝ հղում անելով Express պարբերականին, այս ախտանշանները կարող են վկայել նաև մի շարք այլ վտանգավոր հիվանդությունների մասին: Նման հիվանդությունների շարքին է դասվում արյան քաղցկեղը, որն իր զարգացման սկզբնական շրջանում կարող է դրսևորվել մրսածություն հիշեցնող ախտանշաններով: Սա է պատճառը, որ ինքնազգացողության վատթարացման դեպքում հարկավոր է ուշադրություն դարձնել օրգանիզմում տեղի ունեցող բոլոր փոփոխություններին, քանի որ անվնաս թվացող ախտանշանները երբեմն պայմանավորված են լինում շատ վտանգավոր խանգարումներով:

Շատ հաճախ մարդիկ գրիպի ու մրսածության հետ են շփոթում մոնոնուկլեոզը: Սա սուր վարակիչ հիվանդություն է, որի հարուցիչն է Էպշտեյն-Բարի վիրուսը կամ ցիտոմեգալովիրուսը: Մոնոնուկլեոզի դեպքում նկատվում է տենդ, թուլություն ու կոկորդի ցավ, ուստի հաճախ առաջին հայացքից այն դժվար է լինում տարբերել: Այս հիվանդությունը վտանգավոր է իր հետևանքներով, քանի որ մոնոնուկլեոզի դեպքում կարող է զարգանալ իմունոդեֆիցիտ ու ախտահարվել լյարդը: Հարկ է հիշել, որ մոնոնուկլեոզին բնորոշ է պարանոցի ու մարմնի այլ հատվածների ավշային հանգույցների բորբոքումը, ուստի այս ախտանշանի դեպքում հարկավոր է անհապաղ դիմել բժշկին:

Մրսածությանը բնորոշ բարձր ջերմությամբ ու թուլությամբ կարող է դրսևորվել նաև մեկ այլ վտանգավոր վարկիչ հիվանդություն՝ մենինգիտը, որի դեպքում բորբոքվում է գլխուղեղն ու ողնուղեղը պաշտպանող մեմբրանը: Այս հիվանդությունը գրիպից ու մրսածությունից տարբերելու համար հարկավոր է ուշադրություն դարձնել միայն դրան բնորոշ ախտանշաններին, որոնց թվում են լուսավախությունն ու ծոծրակի մկանների ռիգիդությունը: Այս հիվանդության զարգացման դեպքում հարկավոր է հնարավորինս շուտ դիմել բժշկին: Հարկ է հիշել, որ մենինգիտը կարող է լինել վիրուսային կամ բակտերիալ բնույթի, իսկ դրանց բուժման եղանակները տարբեր են լինում: Սա է պատճառը, որ ոչ մի դեպքում չի կարելի զբաղվել ինքնաբուժությամբ:

Եթե մրսածության ախտանշաններն անհետանում են ու հիվանդի ինքնազգացողությունը բարելավվում է, սակայն մի քանի օր անց (մինչև երկու շաբաթ) ախտանշանները կրկին վերադառնում են, ապա ամենայն հավանականությամբ դրանք պայմանավորված են թոքաբորբով: Այս դեպքում սխալ բուժումից խուսափելու համար հարկավոր է ուշադրություն դարձնել այնպիսի ախտանշանների առկայությանը, ինչպիսին են ջերմության բարձրացումը կամ իջեցումը, ինչպես նաև հազը, որը նախ սկսվում է որպես չոր հազ, այնուհետև նկատվում է նաև խորխային արտադրություն ու արյուն: Նման դեպքերում հարկավոր է անհապաղ դիմել բժշկին:

Հարկ է նաև հիշել, որ մրսածության ու սուր վարակիչ շնչառական հիվանդությունների հարուցիչ վիրուսները կարող են դառնալ նաև բրոնխաբորբի զարգացման պատճառ, որի ախտանշանները նույնպես շատ նման են գրիպի ու մրսածության ախտանշաններին: Այս հիվանդության դեպքում հազը շատ ավելի երկար է պահպանվում (մինչև երեք շաբաթ), ինչն էլ թույլ է տալիս տարբերել այն մրսածությունից: Բրոնխաբորբի դեպքում հարկավոր է անպայման դիմել բժշկին ու սկսել բուժումը, քանի որ անուշադրության մատնելու հետևանքով այն կարող է վերածվել թոքաբորբի: