7 արտասովոր ախտանշան, որոնք հուշում են գլխուղեղում ուռուցքի զարգացման մասին

Գլխուղեղի ուռուցքի ախտանշաններին անդրադառնալիս շատերն ընդգծում են գլխացավերն ու գերհոգնածությունը, քանի որ դրանք համարվում են այս խնդրի հիմնական ախտանշանները, սակայն քչերը գիտեն, որ այս հիվանդությունը կարող է դրսևորվել նաև մի շարք այլ ախտանշաններով: Ձեր ուշադրությանն ենք ներկայացնում 7 արտասովոր ախտանշան, որոնք կհուշեն գլխուղեղում ուռուցքի զարգացման մասին ու թույլ կտան ժամանակին հայտնաբերել խնդիրը:

Պերիֆերիկ տեսողության խանգարումներ

Այս ախտանշանն առավել հաճախ նկատում են ավտոմեքենա վարողները: Այս դեպքում նեղանում է մարդու տեսադաշտն ու ի հայտ են գալիս հատվածներ, որոնք նա չի տեսնում: Նման խանգարումը կարող է վկայել հիպոֆիզի հատվածում առաջացած ուռուցքի մասին:

Վերջույթներում ցավային ռեակցիայի բացակայություն

Եթե ուռուցքը զարգանում է գլխուղեղի՝ մկանների աշխատանքի համար պատասխանատու հատվածում, ապա գլխուղեղի ազդանշանները մկանները դժվարությամբ են ստանում: Այս ամենի արդյունքում կարող է նկատվել վերջույթների թուլություն կամ դրանք կարող են որոշ չափով կորցնել զգայունությունը ցավի նկատմամբ:

Բացասական հույզեր

Գլխուղեղի ուռուցքը հաճախ ազդում է նաև մարդու բնավորության ու պահվածքի վրա, ինչի հետևանքով մարդը հաճախ դառնում է զայրացկոտ, դյուրագրգիռ, անհանգիստ ու զգացմունքային: Գլխուղեղի ճակատային հատվածում ուռուցքի առաջացման դեպքում կարող են նկատվել նաև անհատականության փոփոխություններ, ինչպես դեմենցիայի կամ շիզոֆրենիայի դեպքում է տեղի ունենում:

Խոսքի հետ կապված խնդիրներ

Այս հիվանդության դեպքում կարող են նկատվել նաև խոսքի խանգարումներ: Օրինակ՝ մարդը կարող սկսել կակազել կամ չկարողանա խոսակցության ընթացքում «գտնել» անհրաժեշտ բառը:

Քայլվածքի փոփոխություններ

Գլխուղեղում ուռուցքի զարգացման դեպքում մարդը կարող է մի կողմ թեքված քայլել և անգամ չնկատել դա: Այս ախտանշանը հուշում է հավասարակշռության կորստի մասին, որը պայմանավորված է ուռուցքով:

Տարածության մեջ կողմնորոշման կտրուկ կորուստ

Եթե մարդը գիշերվա ժամերին չի կարողանում տարածության մեջ կողմնորոշվել անգամ սեփական բնակարանում, ապա ամենայն հավանականությամբ խնդիրը պայմանավորված է գլխուղեղում ուռուցքի առկայությամբ: Խնդիրը հատկապես լուրջ է, եթե նման դեպքերը հաճախակի բնույթ են կրում:

Լսողության հետ կապված խնդիրներ

Գլխուղեղում ուռուցքի առկայության մասին կարող է հուշել նաև լսողության վատթարացումը, խոսքն ու ձայներն ընկալելու անկարողությունն ու ականջներում լսվող աղմուկը:

Նյութի աղբյուրը՝ medikforum.ru