Մասնագետները ներկայացրել են այն հիվանդությունները, որոնք առավել հաճախ ախտորոշվում են կանանց մոտ

Կան մի շարք հիվանդություններ ու խանգարումներ, որոնք կարող են զարգանալ ինչպես կանանց, այնպես էլ տղամարդկանց մատ, սակայն ինչ-ինչ պատճառներով առավել հաճախ ախտահարում են կանանց: Մասնագետները ներկայացրել են դրանցից ամենատարածվածները, որոնց թվում են միզուղիների վարակներն ու դաստակային թունելի համախտանիշը:

Վիճակագրական տվյալներով՝ կանանց մոտ երկու անգամ ավելի հաճախ են ախտորոշվում տագնապային խանգարումներ: Բացի այդ, կանայք շատ ավելի հաճախ են բախվում ընկճախտի խնդրին, ինչը կարող է պայմանավորված լինել տարբեր պատճառներով, այդ թվում՝ հղիությամբ, դաշտանային ցիկլի ընթացքում հորմոնների մակարդակի տատանմամբ, դաշտանադադարով և այլն:

Կանանց մոտ ավելի հաճախ է զարգանում նաև օստեոպորոզը, ինչը նույնպես ունի իր պատճառները: Բանն այն է, որ կանանց ոսկորներն ավելի փխրուն են, իսկ կյանքի տևողությունը՝ ավելի երկար:

Կանանց մոտ առավել հաճախ ախտորոշվող հիվանդությունների շարքին է դասվում նաև կրծքի քաղցկեղը, ինչն առավել հաճախ կապված է լինում գենետիկայի հետ: Բացի այդ, կա միայն կանանց ախտահարող ավելի քան 80 տարատեսակ աուտոիմունային հիվանդություն, որոնց դեպքում գիտնականներն մինչ օրս չեն կարողանում պարզել, թե ինչով է պայմանավորված նման օրինաչափությունը:

Գլխուղեղի կաթվածն այն հիվանդություններից է, որը կարող է ախտորոշվել ինչպես կանանց, այնպես էլ տղամարդկանց մոտ, սակայն այս խնդրի հետևանքով առավել հաճախ մահանում են կանայք: Այս օրինաչափությունը պայմանավորված է մի շարք գործոններով, որոնց թվում են հակաբեղմնավորիչ դեղահաբերի ընդունումը, հղիությունը, հորմոնալ թերապիան և այլն:

Անմիզապահությունը նույնպես առավել հաճախ ի հայտ է գալիս կանանց մոտ, ինչի պատճառը որպես կանոն ծննդաբերությունն է: Բացի այդ, կանանց մոտ շատ ավելի հաճախ են զարգանում նաև միզուղիների վարակներ, քանի որ կանանց միզուկն ավելի կարճ է ու լայն, ինչը թույլ է տալիս բակտերիաներին հեշտությամբ ախտահարել միզասեռական օրգանները:

Առավել հաճախ կանանց մոտ ախտորոշվող խնդիրներից են նաև սաստիկ գլխացավերն ու դաստակային թունելի համախտանիշը, որը պայմանավորված է լինում կնոջ օրգանիզմի ֆիզիոլոգիական առանձնահատկություններով, գենետիկայով կամ հորմոնալ փոփոխություններով: Բացի այդ, իգական սեռի ներկայացուցիչները հաճախ են բախվում քրոնիկ հոգնածության համախտանիշին, ինչը կապված է ներընտանեկան ու աշխատանքային հոգսերի, ինչպես նաև գերծանրաբեռնվածության հետ:

Վահանագեղձի հիվանդությունները նույնպես առավել հաճախ ախտորոշվում են հենց կանանց մոտ, ինչը կապված է հորմոնալ ֆոնի հետ: Բացի այդ, կանանց մոտ հաճախ ախտորոշվող հիվանդությունների շարքին են դասվում նաև այնպիսի խանգարումները, ինչպիսին են գրգռված աղու համախտանիշը, տրիխոտիլոմանիան, դերմատիլոմանիան ու անգամ կոտրված սրտի համախտանիշը:

Նյութի աղբյուրը՝ actualnews.org